የኬኒያው ተቃዋሚ ኦዲንጋ በገዥው ፓርቲ ላይ የሚደረገው የጥላቻ ዘመቻ እንዲቆም ደጋፊዎቻቸውን ጠየቁ

የኬንያ ተቃዋሚ መሪ ራይላ ኦዲንጋ ለደጋፊዎቻቸው ባስተላለፉት መልዕክት እንዳሉት በገዥው ፓርቲ ጁቪሊስ እና በፕሬዝዳንቱ ኡሁሩ ኬንያታ ላይ ደጋፊዎቻቸው የሚያደርጉትን ማጥላላት እንዲያቆሙ ጥሪ አቅርበዋል፡፡

የራይላ ኦዲንጋ ደጋፊዎች ከአሁን በፊት ገዥው ፓርቲ በሚያካሂደው የንግድ ስራ እና ምርቶቹ ላይ የማጥላላት ዘመቻ እንዲያቆሙ የተቃዋሚው መሪ ጥሪ ያቀረቡት ከፕሬዝዳንት ኡሁሩ ኬኒያታ ጋር ባደረጉት ስምምነት መሰረት ነው፡፡ 
ራይላ ኦዲንጋ ይህን መግለጫ ያስተላለፉት ዓለም አቀፉ የሠራተኞች ቀን ሜይዴይ በዋና ከተማዋ ናይሮቢ ውስጥ በተከበረበት ወቅት ነው፡፡

ባለፈው መጋቢት ወር ላይ ሁለቱ ባላንጣ መሪዎች አብረው ለመስራት መስማማታቸው የሚታወስ ሲሆን የአሁኑ ንግግራቸው ደግሞ በመሃከላቸው የሚኖረውን ቁርኝት በማጠናከር ለጋራ ልማት እንደሚቆሙ ያላቸውን አንድነት የሚያሳይ ነው ተብሏል፡፡

በተቃዋሚዎች የማጥላላት ዘመቻ የአገሪቱ ትልቁ የቴሌኮም ኩባንያ እና ብሩካሲድ የተባለው አንድ ከፍተኛ የወተት ተዋጽኦ ኩባንያ የጥቃቱ ሰለባ እንደነበሩ ቢቢሲ ዘግቧል፡፡