ፕሬዚዳንት ዶ/ር ሙላቱ ተሾመ የራያ ዩንቨርስቲን መርቀው ከፈቱ

የኢፌዴሪ ፕሬዚዳንት ዶክተር ሙላቱ ተሾመ የራያ ዩንቨርስቲን በዛሬው እለት መርቀው ከፍተዋል።

ፕሬዚዳንት ዶክተር ሙላቱ ተሾመ ከትግራይ ክልል ምክትል ርእሰ መስተዳደር ዶክተር ደብረጺዮን ገብረሚካኤል እና ከኢፌዴሪ ትምህርት ሚኒስትር ዶክተር ጥላዬ ጌቴ ጋር በመሆን ነው ዩኒቨርሲቲውን መርቀው የከፈቱት።

raya_univ_2.jpg

በትግራይ ክልል በደቡባዊ ዞን ማይጨው ከተማ በመገኘት ዩኒቨርሲቲውን መርቀው የከፈቱት ፕሬዚዳንት ዶክተር ሙላቱ ተሾመ የእንኳን ደስ አላችሁ መልእክትም አስተላልፈዋል።

ፕሬዚዳንት ዶክተር ሙላቱ ባስተላለፉት መልእክት፥ በከፍተኛ የትምህርት ተቋማት የትምህርት ጥራትን ለማረጋገጥ የማስፋፊያ መርሃ ግብር በተጠናከረ መልኩ መተግበር አለበት ብለዋል።

ፕሬዚዳንቱ አክለውም፥ ዩኒቨርሲቲዎች የአካባቢውን ማህበረሰብ ተጠቃሚ የሚያደረርጉ ቢያንስ ሶስት የልእቀት ማእከላት ከፍተው ሊሰሩ እንደሚገባም አስታውቀዋል።

የትምህርት ጥራትን ውጤታማ ለማድረግም የቅድመ ምረቃ ምጣኔ 95 በመቶ ለማድረስ ሊሰራ እንደሚገባም ነው ፕሬዚዳንት ዶክተር ሙላቱ ያስታወቁት።

የትግራይ ክልል ምክትል ርእሰ መስተዳደር ዶክተር ደብረጺዮን ገብረሚካኤል በበኩላቸው፥ በዛሬው እለት በይፋ ተመርቆ የተከፈተው የራያ ዩኒቨርሲቲ የአካባቢውን ማህበረሰብ ችግር በሚፈቱ ጉዳዮች ላይ ትኩረት አድርጎ መስራት አለበት ብለዋል።

በተለይም ከቅርብ ጊዜ ወዲ በበለስ ተክል ላይ በተከሰተውን በሽታ ዙሪያ ሳይንሳዊ የሆኑ ምርምሮችን በማድረግ በሽታውን ለመቆጣጠር መስራት እንዳለበትም ገልፀዋል።

የአሸንጌ ሀይቅ ላይ የተስተዋለውን የውሃ መጠን መቀነስ ችግርም መከላከል በሚቻልበት ዙሪያ ላይ እንዲሰራም ጥሪያቸውን አስተላልፈዋል።

የራያ ዩኒቨርሲቲ ፕሬዚዳንት ፕሮፌሰር ታደሰ ደጀኔ በበኩላቸው፥ የዩኒቨርሲቲው የመጀመሪያ ዙር ግንበታ በ264 ሚሊየን ብር መከናወኑን አስታውቀዋል።

የራያ ዩኒቨርሲቲ በአሁኑ ወቅትም 1 ሺህ 400 ተማሪዎችን ተቀብሎ በማስተማር ላይ እንደሚገኝም ፕሮፌሰር ታደሰ ደጀኔ ተናግረዋል።

ዩኒቨርሲቱው እዚህ ደረጃ ላይ እንዲደርስ አስተዋጽኦ ላደረጉት የትግራይ ክልል መንግስት እና ለአካባቢው ነዋሪዎችም ምስጋናቸውን አቅርበዋል።

አዲሱ የራያ ዩንቨርስቲ ከመቐለ ከተማ 120 ኪሎ ሜትር በደቡባዊ ዞን ማይጨው ከተማ ላይ የሚገኝ ነው።

በሙልጌታ አፅበሃ – ኤፍ.ቢ.ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram