ፌዴሬሽኑና የኢትዮጵያ ዳኞችና ታዛቢዎች ማህበር ፕሪምየር ሊጉ እንዲቀጥል ተስማሙ

የኢትዮጵያ እግር ኳስ ፌዴሬሽን እና የኢትዮጵያ ዳኞችና ታዛቢዎች ማህበር ተቋርጦ የነበረውን የኢትዮጵያ ፕሪምየር ሊግ ለማስቀጠል ከስመምነት ደርሰዋል።

የኢትዮጵያ እግር ኳስ ፌዴሬሽን እና የኢትዮጵያ ዳኞችና ታዛቢዎች ማህበር በዛሬው እለት ባካሄዱት የጋራ ስብሰባ ነው ከስምምነት ላይ የደረሱት።

የኢትዮጵያ ዳኞች እና ታዛቢዎች ለ3 ሳምንታት ማንኛውንም ውድድር ላለመዳኘት ከውሳኔ ላይ ደርሶ እንደነበረ እና በዚህም መሰረት የኢትዮጵያ ፕሪምየር ሊግ መቋረጡ ይታወሳል።

በወቅቱም የኢትዮጵያ ዳኞችና ታዛቢዎች ማህበር 10 ቅድመ ሁኔታዎች እንዲተገበሩ አስቀምጦ ነበር።

በ2010 ዓ.ም የውድድር ዘመን የተጎዱ ዳኞች ተገቢው ካሳ እንዲሰጣቸው፣ ውድድሩን ከመጀመራችን በፊት በውድድር ደንቡ መሰረት የመድህን ዋስትና እንዲገባላቸው፣ ረዳት ዳኛ ሙስጠፋ መኪ ተገቢውን ህክምና እንዲያገኝ የሚሉት ይገኝበታል።

ሁለቱ አካላትም በዛሬው እለት ባካሄደው ስብሰባቸው ከስምምነት ላይ የደረሱ ሲሆን፥ የተቋረጠው የኢትዮጵያ ፕሪምየር ሊግም እንዲቀጥል ተወስኗል።

በዛሬው ስብሰባም ፌዴሬሽኑ በወልድያ ጉዳት ለደረሰበት ዳኛ 100 ሺህ ብር አንዲከፍል፤ ወልድያ ከተማ ደግሞ በሀገር ውስጥም ይሁን በውጭ አስፈላጊውን የህክምና ወጪ እንዲሸፍንም ውሳኔ ተላልፏል።

የኢትዮጵያ እግር ኳስ ፌዴሬሽን እና የኢትዮጵያ ዳኞችና ታዛቢዎች ማህበር በደረሱት ምስስነት መሰረትም የተቋረጠው የኢትዮጵያ ፕሪምየር ሊግ የሚቀጥል ይሆናል።

ፕሪምየር ሊጉ የሚጀምርበት ቀንም በቀጣይ የሚገለጽ እንደሚሆን ተነግሯል።

በአወቀ አብረሃም – ኤፍ.ቢ.ሲ

Share your thoughts on this post