ፈረንሳይ የኢትዮ-ኤርትራን ጉዳይ በሰላማዊ መንገድ ለመፍታት የሚደረገውን ጥረት ትደግፋለች – የፈረንሳይ የውጭ ጉዳይ ሚኒስትር

ኢትዮጵያ ከኤርትራ ጋር የነበረውን አለመግባባት ሰላማዊ በሆነ መንገድ ለመፍታት በምታደርገው እንቅስቃሴ ፈረንሳይ ድጋፍ እንደምታደርግ የሀገሪቱ ውጭ ጉዳይ ሚኒስትር ጂያን ይቬስ ሊ ድሪያን ገለጹ።

የውጭ ጉዳይ ሚኒስትር ዥያን ይቭስ ለድርየን በኢትዮጵያ ይፋዊ የስራ ጉብኝት ለማድረግ ትላንት ወደ አዲስ አበባ ገብተዋል፡፡

የኢፌዴሪ ምክትል ጠቅላይ ሚኒስትር አቶ ደመቀ መኮንን የውጭ ጉዳይ ሚኒስትር ዥያንን በጽሕፈት ቤታቸው ተቀብለው አነጋግረዋል።

የኢትዮጵያ መንግስት የጀመረው የሰላም እንቅስቃሴና የኢኮኖያዊ ማሻሻያ ተስፋ ሰጭ ስለመሆኑ የውጭ ጉዳይ ሚኒስትሩ ለጋዜጠኞች ገልጸዋል።

በኢትዮጵያና ኤርትራ መካከል ተቋርጦ የነበረው ግንኙነትም ሰላማዊ በሆነ መንገድ እንዲቀጥል ፈረንሳይ አስፈላጊውን ሁሉ ድጋፍ ታደርጋለች ብለዋል።

በተባበሩት መንግስታት ድርጅት ፈረንሳይ ቋሚ ኢትዮጵያ ደግሞ ተለዋጭ የጸጥታው ምክር ቤት አባል መሆናቸውን ያስታወሱት ሚኒስትሩ ኢትዮጵያ የጀመረችውን ሰላማዊ የለውጥ እንቅስቃሴ አጠናክራ እንድትቀጥል ጠይቀዋል።

ከሰላም ድርድሩ ባለፈ በመንግስት ስር በነበሩ የልማት ድርጅቶች የግል ባለሃብቱ አክሲዮን በመግዛት እንዲሳተፍ መደረጉ እንዳስደሰታቸውም ገልጸዋል።

ሀገሪቱ የጀመረችውን የለውጥ እንቅስቃሴ በመደገፍ የሁለቱ አገራት ኢኮኖሚያዊና ዲፕሎማሲያዊ ትብብር እንዲጎለብትም ጥረት እናደርጋለን ብለዋል።

ምክትል ጠቅላይ ሚኒስትር ደመቀ መኮንን በበኩላቸው የአገሪቱን ሰላምና ኢኮኖሚያዊ እድገት ዘላቂ ለማድረግ የኢህአዴግ ስራ አስፈፃሚ ኮሚቴ ያሳለፋቸው ውሳኔዎች ተቀባይነት ያላቸው ስለመሆናቸው ማብራሪያ ሰጥተዋል፡፡

የፈረንሳይ የውጭ ቀጥተኛ ኢንቨስትመንት ፍሰት ከጊዜ ወደ ጊዜ እየጨመረ የመጣ ሲሆን፥ 5ኛው የኢትዮ ፈረንሳይ የቢዝነስ ፎረም በዚህ ዓመት መጋቢት ወር ላይ በአዲስ አበባ መካሄዱ ይታወሳል።

121 የፈረንሳይ የኢንቨስትመንት ፕሮጀክቶች በኢትዮጵያ የተመዘገቡ ሲሆን፥ ከእነዚህ ውስጥ 65 የኢንቨስትመንት ፕሮጀክቶች በስራ ላይ ይገኛሉ።

በ1890 ዓ.ም የተጀመረው የኢትዮጵያ እና የፈረንሳይ ግንኙነት አንድ ምዕተ ዓመትን አስቆጥሯል።

 

 

ምንጭ፦ኢዜአ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram