ጣሊያናዊው ግብ ጠባቂ ቡፎን የጁቬንቱስ ቆይታው ቅዳሜ እንደሚጠናቀቅ አስታወቀ

ጣሊያናዊው ግብ ጠባቂ ጃንሉውጂ ቡፎን የፊታችን ቅዳሜ ለክለቡ ጁቬንቱስ የመጨረሻውን ጨዋታ እንደሚያደርግ አስታወቀ።

ለጣሊያኑ ጁቬንቱስ የእግር ኳስ ክለብ ላለፉት 17 ዓመታት የተጫወተው የ40 ዓመቱ ቡፎን፥ ቅዳሜ እለት ከጁቬንቱስ ጋር የነበረው ቆይታ እንደሚጠናቀቅም አስታውቋል።

ከጣሊያን ብሄራዊ ቡድን ጋር የዓለም ዋንጫን ማንሳት የቻለው ቡፎን፥ ከጁቬቱስ ጋር በመሆን 9ኛ የሴሪ አ ዋንጫውን ከሄላስ ቮሬና ጋር በአሊያንዝ ስታዲየም በሚያደርጉት ጨዋታ እንደሚያነሳም ተነግሯል።

ቡፎን በሰጠው አስተያየት፥ “ከ15 ቀን በፊት ከእግር ኳስ ዓለም ለመገለል አስቤ ነበር፤ አሁን ግን ሀሳቤን ቀይሬያለው፤ በእግር ኳስ ሜዳ ላይ እና ከሜዳ ውጪ የስራ እድሎች ቀርበውልኛል” ሲል ተናግሯል።

“በቀጣዩ ሳምንትም ውሳኔዬን አሳውቃለሁ” ብሏል።

ቡፎን በአውሮፓ ቻምፒየንስ ሊግ ከሪያል ማድሪድ ጋር ባደረጉት የሩብ ፍጻሜ ጨዋታ በቀይ ካርድ ከሜዳ ስላወጡት ዳኛ ማይክል ኦሊቨር የሰጠውን ያልተገባ አስተያየት ተከትሎ ከአውሮፓ የእግር ኳስ ማህበር እግድ እንደተጣለበት ይታወሳል።

በፎን ዛሬ በሰጠው መግለጫም፥ ስለ ዳኛው የሰጠው ያልተገባ አስተያየት እንዳሳዘነው እና ይቅርታ እንደሚጠይቅ ገልጿል።

“ዳኛ ማይክል ኦሊቨር በድጋሜ ካገኘሁት መጀመሪያ አቅፌ ይቅርታ እጠይቀዋለሁ፤ ቀጥሎም እንድንወያይ ጊዜ እንዲሰጠኝ እጠይቀዋለሁ” ብሏል።

እንደ አውሮፓውያኑ አቆጣጠር በ2001 ከፓርማ ጁቬንቱስን የተቀላቀለው ቡፎን ክለቡን ስለመልቀቅ አስቦ እንደማያውቅ እና ጁቬንቱስን ለቆ ወደ ሌላ ቦታ መሄድ ለእሱ በዝቅተኛ ሊግ ውስጥ እንደመጫወት መሆኑን መግለጹ ይታወሳል።

ምንጭ፦ ቢቢሲ

Share your thoughts on this post