ጠ/ሚ ዶክተር አብይ አህመድ ለጨምበላላ በዓል የእንኳን አደረሳችሁ መልዕክት አስተላለፉ

የኢፌዴሪ ጠቅላይ ሚኒስትር ዶክተር አብይ አህመድ የሲዳማ ሕዝብ የዘመን መለወጫ በዓል ጨምበላላ ሁሉም ኢትዮጵያዊ የሚጋራው በዓል መሆኑን ተናገሩ።

ጠቅላይ ሚኒስትሩ ከትናንት ጀምሮ እየተከበረ ያለውን የፊቼ ጨምበላላን በዓል አስመልክቶ የመልካም በዓል ምኞታቸውን አስተላልፈዋል።

ጠቅላይ ሚኒስትሩ የማህበረሰብ የዘመን ቀመር ዕውቀት የሰው ልጆች ስልጣኔ እና ያለፉበት የታላቅነት የዘመን መልክ አንዱ መመዘኛ መሆኑንም ተናግረዋል።

የሲዳማ ሕዝብ በፀሀይ፣ በጨረቃና በክዋክብት ረቂቅ ተፈጥሯዊ ዑደት ያለውን ጥልቅ አጽናፈ ዓለም በመመርመር፥ ዘመንን የሚቀምርበት ጨምበላላ የሚደነቅና የሁላችንም ኩራት የሚሆን ጥበብ ነው ብለዋል ጠቅላይ ሚኒስትሩ።

ዕውቀቱ እስከ ማይክሮ ሰከንድ ሽርፍራፊ የጊዜ ቅንጣት በመውረድ ጊዜን መለካቱ ኩራትና ክብራችንን ዕጥፍ ድርብ ያደርገዋልም ነው ያሉት።

በመሆኑም የሲዳማ ህዝብን እሴት የደቡብ ክልል ሕዝብ ብቻ ሳይሆን መላው ኢትዮጵያዊ ክብሩንና በዓሉን በፍቅር እንደሚጋራውም አንስተዋል።

ይህን ውብ በዓልና የአከባበር ስርዓቱን ለዘመናት ጠብቆ በማቆየት ለዚህ ዘመን የሃገርና የዓለም ህያው ሀብት እንዲሆን ላደረገው፥ የሲዳማ ሕዝብም ከፍ ያለ ክብርና አድናቆታቸውን ገልጸዋል።

መጭው ዘመን የሠላም፣ የይቅርታ፣ የፍቅርና የአንድነት እንዲሆንም ነው ጠቅላይ ሚኒስትሩ መልካም ምኞታቸውን የገለጹት።

ለተከታታይ ሁለት ሳምንታት በተለያዩ ዝግጅቶች የሚከበረው የሲዳማ ብሔር ዘመን መለወጫ ፊቼ ጨምባላላ በዓል፥ በተባበሩት መንግስታት የትምህርት፣ የሳይንስና ባህል ድርጅት (ዩኔስኮ) በ2008 ዓ.ም. በማይዳሰስ ቅርስነት መመዝገቡ ይታወሳል።

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram