ጠ/ሚኒስትር ዶ/ር አብይ አህመድ ለይፋዊ የስራ ጉብኝት የተባበሩት አረብ ኢምሬት ገቡ

የኢፌዲሪ ጠቅላይ ሚኒስትር ዶ/ር አብይ አህመድ የሳዑዲ አረቢያ ጉብኝታቸውን በማጠናቀቅ ለይፋዊ የስራ ጉብኝት የተባበሩት አረብ ኢምሬት ገቡ።

ጠቅላይ ሚኒስትር ዶክተር አብይ የተባበሩት አረብ ኢምሬት ዋና ከተማ አቡዳቢ ሲደርሱ በሀገሪቱ ከፍተኛ የመንግስት ባለስልጣናት አቀባበል ተደርጎላቸዋል።

በተባበሩት አረብ ኢምሬትስ ቆይታቸው በተለያዩ ጉዳዮች ከሀገሪቱ ከፍተኛ መንግስት ባለስልጣናት ጋር ወይይት እንደሚያደርጉ ይጠበቃል።

ጠቅላይ ሚኒስትሩ አብይ ሀሙስ ዕለት ወደ ሳዑዲ አረቢያ በማቅናት በተለያዩ ጉዳዮች ስምምነት ላይ መድረሳችው ይታወቃል።

በሳዑዲ አረቢያ ጉብኝት ጉብኝታቸው በሀገሪቱ በሚገኝ ሆስፒታል የህክምና ስህተት የአልጋ ቁራኛ የሆነውን ታዳጊ መሀመድ አብዱልአዚዝን ሆስፒታል በመገኘት እንደጎበኑ ይታወቃል።

በዚሁ ጊዜም ጠቅላይ ሚኒስትር ዶክተር አብይ ለዓመታት ታዳጊውን እያስታመሙ ያሉትን እናት አፅናንተው፤ መንግስት ዜጋውን ለመደገፍ ሁሉንም ጥረት ያደርጋል ብለዋል።

ጠቅላይ ሚኒስትሩ በሳዑዲ አረቢያ በቆይታቸው በተለያዩ እስር ቤቶች የሚገኙ ኢትዮጵያውያን ከእስር እንዲለቀቁ ከስምምነት የደረሱ ሲሆን፥ በዚህም 1 ሺህ ኢትዮጵያውያን ከነገ ጀምሮ ከተለያዩ እስር ቤቶች እንዲለቀቁ ትእዛዝ ተላልፏል ።

Share your thoughts on this post