ጠቅላይ ሚኒስትር ዶ/ር አብይ በ100 ቀናት የኢትዮጵያን ተሰሚነት ከፍ የሚያደርጉ ዲፕሎማሲ ስራዎችን አከናውነዋል- ምሁራን

ጠቅላይ ሚኒስትር ዶክተር አብይ አህመድ ባለፉት 100 ቀናት የኢትዮጵያን ተሰሚነት ከፍ የሚያደርጉ ዲፕሎማሲያዊ ስራዎችን አከናውነዋል አሉ ፋና ብሮድካስቲንግ ኮርፖሬት ያናገራቸው ምሁራን።

ጠቅላይ ሚኒስትሩ ወደ ስልጣን ከመጡ ወዲህ የአፍሪካ ቀንድን ቀጠናዊ ውህደት ለማፋጠን እየተጉ መሆኑንም ገልፀዋል።

ዶክተር አብይ ጅቡቲን መነሻቸው አድርገው በኬንያ፣ ሱዳን፣ ሩዋንዳ፣ ሶማሊያ፣ ግብፅ እና በቅርቡም በኤርትራ ጉብኝት አድርገዋል።

በመካከለኛው ምስራቅም በርካታ ኢትዮጵያውያን በሚገኙባቸው ሳኡዲ አረቢያ እና የተባበሩት አረብ ኤሚሬትስ ተገኝተው የታሰሩ ዜጎችን አስፈትተዋል።
ሀገራቱ ከኢትዮጵያ ጋር ተባብረው በሚሰሩባቸው መስኮች ላይም መክረዋል።

ኢትዮጵያ እና የተባበሩት አረብ ኤሚሬትስ በአጠቃላይ 3 ቢሊየን የአሜሪካ ዶላር መጠን ያላቸው የውጭ ምንዛሬ ድጋፍ እና ኢንቨስትመንት ስምምነቶች እንዲፈራረሙም የማግባባት ስራን ሰርተዋል።

ጠቅላይ ሚኒስትር ዶክተር አብይ በግብፅ ባደረጉት ጉብኝት የአባይ ወንዝ አጠቃቀም ላይ በሀገራቱ መካከል መተማመን እንዲኖር ሰርተዋል።

የሁለቱ ሀገራት ህዝቦች አባይን በፍትሃዊነት የመጠቀም መብት እንዳላቸውም አረጋግጠዋል።

ጠቅላይ ሚኒስትር አብይ እና ፕሬዚዳንት አብዱልፈታህ ኤል ሲሲ ጥርጣሬን ትቶ የሀገራቱን የረጅም አመት ወዳጅነት ማጠናከር እንደሚገባ ተስማምተዋል።

ጠቅላይ ሚኒስትር ዶክተር አብይ ባለፈው አርብ ለታሪካዊ ጉብኝት አስመራ ሲገቡም ደማቅ አቀባበል ጠብቋቸዋል።

የደቡብ ሱዳን የእርስ በርሰ ግጭት እንዲያበቃም ፕሬዚዳንት ሳልቫ ኪር እና ተቀናቃኛቸው ሪክ ማቻር በአዲስ አበባ ፊት ለፊት ተገናኝተው እንዲመክሩ አድርገዋል።

በአዲስ አበባ ዩኒቨርሲቲ የታሪክ ተመራማሪው አቶ አበባው አያሌው፥ ጠቅላይ ሚኒስትሩ በእነዚህ ሀገራት በነበራቸው ቆይታ ያከናወኗቸው ዲፕሎማሲያዊ ስራዎች፤ ኢትዮጵያ በአፍሪካ ቀንድ ውህደት ለመፍጠር የጀመረችውን እንቅስቃሴ እያፋጠነ ነው ብለዋል።

ከዚህም ባሻገር ከመካከለኛው ምስራቅ ሀገራት ጋር ያላትን ወዳጅነት ይበልጥ እንድታጎለብት እና ተሰሚነቷን ከፍ ለማድረግ መንቀሳቀሳቸውን ተናግረዋል።

ዶክተር አብይ እስካሁን ካደረጓቸው የውጭ ሀገራት ጉብኝት የኤርትራው ትልቅ ትርጉም እንዳለውም አቶ አበባው ይናገራሉ።

የኢትዮጵያ እና ኤርትራ መቀራረብ ለሀገራቱ ህዝቦች ብቻ ሳይሆን ለቀጠናው ያለው ፋይዳ ከፍተኛ ነው የሚሉት አቶ አበባው ጠቅላይ ሚኒስትሩ ከኤርትራ ጋር ያለውን ጉዳይ ለመፍታት የሄዱበትን ርቀት አድንቀዋል።

የታሪክ ተመራማሪው አቶ አበባው አያሌው፥ ዶክተር አብይ ከዚህም ባሻገር የሀገሪቱን የተሰሚነት ደረጃ እያጎለበቱ መሆኑን ጠቅሰዋል።

በመቀሌ ዩኒቨርሲቲ የፖለቲካ ሳይንስ መምህሩ አቶ መረሳ ፅሃዬ በበኩላቸው፥ ቀጠናው የሽብርተኝነት ፈተና የተጋረጠበት ቢሆንም ዶክተር አብይ እየሄዱበት ያለው የውህደት እንስቃሴ አበረታች መሆኑን መግለፃቸውን ፋሲካው ታደሰ ዘግቧል።

አቶ መረሳ ፅሃዬ አክለውም፥ የኢትዮጵያ እና ኤርትራ ቁርሾ በዶክተር አብይ ፈርሷል፤ ነገር ግን በኤርትራ መንግስት በኩል እንደ ኢትዮጵያ ሁሉ የሪፎርም ስራዎች መሰራት አለባቸው ይላሉ።

ይህ ካልሆነ የተጀመረው የሰላም ጉዞ ሊሰናከል እንደሚችልም ጥርጣሬ አላቸው የፖለቲካ ሳይንስ መምህሩ አቶ መረሳ ፅሃዬ።

ቀጠናው የሽብርተኝነት ፈተና የተጋረጠበት ቢሆንም ዶክተር አብይ እየሄዱበት ያለው የውህደት እንስቃሴ አበረታች መሆኑን የመቀሌ ዩኒቨርሲቲ የፖለቲካ ሳይንስ መምህሩ አቶ መረሳ ይናገራሉ።

በፋሲካው ታደሰ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram