ጠቅላይ ሚኒስትር ዶ/ር አብይ በሳዑዲ በህክምና ስህተት የአልጋ ቁራኛ የሆነውን ኢትዮጵያ ታዳጊ ጎበኙ

በሳዑዲ አረቢያ ጉብኝት እያደረጉ ያሉት ጠቅላይ ሚኒስትር ዶክተር አብይ አህመድ በሀገሪቱ በሚገኝ ሆስፒታል የህክምና ስህተት የአልጋ ቁራኛ የሆነውን ታዳጊ መሀመድ አብዱልአዚዝን ሆስፒታል በመገኘት ጎብኙ።

በዚሁ ጊዜም ጠቅላይ ሚኒስትር ዶክተር አብይ ለዓመታት ታዳጊውን እያስታመሙ ያሉትን እናት አፅናንተው፤ መንግስት ዜጋውን ለመደገፍ ሁሉንም ጥረት ያደርጋል ብለዋል።

ጠቅላይ ሚኒስትር ዶክተር አብይ አህመድ ከሳዑዲ አረቢያ ልኡል አልጋ ወራሽ መሀመድ ቢን ሰልማን ጋር በተወያዩበት ጊዜ የመሃመድን ጉዳይ አንስተው ነበር።

በዚህም የሳዑዲ አረቢያ መንግስት በህክምና ስህተት ምክንያት ከ12 ዓመታት በላይ የአልጋ ቁራኛ ለሆነው መሃመድ አብዱልአዚዝ አስፋላጊውን ካሳ እንዲከፍለው ጠይቀዋል።

ጠቅላይ ሚኒስትሩ ከሳዑዲ አልጋ ወራሽ ጋር በተገናኙበት ወቅት የታዳጊውን ሁኔታ በማስረዳት ድጋፍ እንዲደረግለት ጠይቀው ልዑሉ ይሁንታቸውን ገልፀዋል።

ጠቅላይ ሚኒስትር ዶክተር አብይ አህመድ የመሃመድ አብዱልአዚዝ ወላጅ እናት ወይዘሮ ሀሊማ ሙዘይል እና አግኝተው ማነጋገራቸው እና ማበረታታቸው ተሰምቷል።

በዚህ ወቅትም ለመሃመድ ወላጆች አስፈላጊውን ድጋፍ እንደሚያደርጉ ገልፀውላቸዋል።

ታዳጊው መሃመድ አብዱላዚዝ ከ12 ዓመት በፊት ባጋጠመው የመተንፈሻ እክል አፍንጫው ላይ ቀዶ ህክምና ለማድረግ ነበር ወደ ጂዳ ሆስፒታል ያመራው።

በወቅቱ የ4 ዓመት ልጅ የነበረው መሃመድ ለቀዶ ህክምና ከገባ በኋላ ግን በተፈፀመ የህክምና ስህተት እስካሁን ድረስ እራሱን ስቶ የአልጋ ቁራኛ ሆኖ ቆይቷል።

የህጻኑ ወላጆችም በልጃቸው ላይ የተፈፀመውን የክህምና ስህተት ተከትሎ ለፍርድ ቤት አመልክተው የሳዑዲ ፍርድ ቤትም ለህጻኑ ካሳ እንዲያገኝ ቢወሰንለትም እስካሁን ግን ካሳውን ማግኘት እንዳልቻሉ ነው የተነገረው።

ኤፍ.ቢ.ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram