ጠቅላይ ሚኒስትር ዶ/ር አብይ በሀዋሳ ከተማ ከነዋሪዎች እየተወያዩ ነው

የኢፌዴሪ ጠቅላይ ሚኒስትር ዶክተር አብይ አህመድ ግጭት በተፈጠረባቸው የደቡብ ብሔር ብሔረሰቦችና ህዝቦች ክልል አካባቢዎች ከሚገኙ ነዋሪዎች ጋር የሚያደርጉትን ውይይት ጀምረዋል።

ጠቅላይ ሚኒስትር ዶክተር አብይ በዛሬው እለት በሀዋሳ ከተማ በመገኘት ከተለያዩ የህብረተሰብ ተወካዮች ጋር በመወያየት ላይ ይገኛሉ።

በፊቼ ጫምባላላ ላይ ለተፈጠረው ግጭትና የደረሰው ጉዳት እንዲሁም የሲዳማ ህዝብ “የክልል እንሁን” ጥያቄዎችን ሲመልሱ ጠቅላይ ሚኒስትር ዶ/ር አብይ አህመድ እንደገለጹት፣ በፊቼ ጫምባላላ ጊዜ ለሰው ደም መፍሰስ ምክንያት የሆኑ ግለሰቦችን መንግስት ከህዝቡ ጋር በመሆን ለሕግ ያቀርባቸዋል፡፡

የሲዳማ ህዝብ የክልል ጥያቄ ለማንሳት ሕገ መንግስቱ ይፈቅድለታል፤ ነገር ግን ጥያቄው በሕገ መንግስታዊ መንገድ ነው የሚፈታው፣ እናንተም ለምን ክልል መሆን አስፈለገን ብላችሁ ከታች እስከ ላይ በሚገባ ተወያዩ እኛም እንወያያለን ብለዋል ጠቅላይ ሚኒስትሩ፡፡

ከሰዓት በኋላ ደግሞ ወላይታ ሶዶ ከተማ በመገኘት ከነዋሪዎች ጋር እንደሚወያዩ ይጠበቃል።

በነገው እለት ደግሞ በወልቂጤ ከተማ በመገኘት ከከተማዋና አካባቢዋ ነዋሪዎች ጋር ይወያያሉ።

ጠቅላይ ሚኒስት ዶክተር አብይ ከነዋሪዎች ጋር የሚያደርጉት ውይይት በከተሞቹ ባለፉት ቀናት የተፈጠረውን ግጭት ተከትሎ የሚደረግ ነው።

ባለፉት ቀናት በሃዋሳ፣ ወልቂጤ እና ወላይታ ሶዶ በተፈጠሩ ግጭቶች 15 ሰዎች መሞታቸውን የክልሉ መንግስት መግለጹ የሚታወስ ነው።

በተፈጠሩ ግጭቶች ሳቢያ በርካታ የንግድ ተቋማት ላይ ዝርፊያ መፈጸሙም ይታወሳል።

ጠቅላይ ሚኒስትር ዶክተር አብይ አህመድ ትናንት በህዝብ ተወካዮች ምክር ቤት በመገኘት በሰጡት ማብራሪያ፥ በእነዚህ አካባቢዎች የተፈጠሩ ግጭቶች የፖለቲካ ትርፍ ለማግኘት በሚንቀሳቀሱ ሃይሎች የተቀነባበሩ መሆናቸውን መናገራቸው ይታወሳል።

ጠቅላይ ሚኒስትሩ በንግግራቸው አንዱን ብሄር ከሌላው በማጋጨት ሃገር መገንባት እንደማይቻል ጠቅሰው፥ የዜጎችን ከቦታ ቦታ ተዘዋውሮ የመስራት መብት ከማስጠበቅ አንጻር የተሰሩ ስራዎች ውስን መሆናቸውን ገልጸዋል።

ከዚህ አንጻርም መንግስት ይህን ለመቅረፍ የሚያስችል ስራ እንደሚሰራ አስረድተዋል።

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram