fbpx

ጎፋ ሳውላ-ከመድመሩ ቀድማ የተደመረች የፍቅር መዲና

ጎፋ ሳውላ-ከመድመሩ ቀድማ የተደመረች የፍቅር መዲና፤ ጎፋ ነቅሎ አደባባይ ወጥቷል፡፡ ሁሌም ጎፋዎችን የሚናፍቀው ልቤ ከዱዛ ተራራ ሥር ይኼን አየሁ፡፡ ሄኖክ ስዩም በድሬቲዩብ

ጎፋ ነቅሎ ስለመደመር ሳውላ ደምቆ ታይቷል፡፡ ጎፋ የመደመር ልብ ያለው ቅን ህዝብ ነው፡፡ የሰውነት አካል በሚያረግፍ ፒስታ መንገድ ዘመኑን ሲጓዝ ቢኖርም የአብሮነት መንፈሱ አልተፈተነም፤ ዞን መሆን የሚገባው፣ በራስ አስተዳደር መዋቀር ያለበት የነገሥታቱ ምድር፣ የሰው ወዳዶቹ ቀጠና ብዙ በደል ደርሶበታል፡፡

ከዚያ ሁሉ ያልተመለሰለት ጥያቄ ይልቅ ጎልቶ ሲሰማ የኖረው ፍቅሩ ነው፡፡ ጎፋ ትናንት ሳውላ ላይ ተአምር ማሳየቱን ተመለከትሁ፡፡ ኮራሁ፡፡ ልቤ እንደ አልባ ዙማ ከፍ ብሎ ደስታዬ ወሰን እስኪያጣ ስሜቴን መግለጽ አልቻልኩም፡፡

ጎፋ ራሱን ከኢትዮጵያ ሉዓላዊነት ጋር አስተሳስሮ የኖረ ህዝብ ነው፡፡ የጎፋ የባህል ልብስ ላይ ያለው ቀይ ቀለም የጎፋ ህዝብ ለኢትዮጵያ እንድነት የከፈለውን መስዋዕትነት የሚዘክር ህያው ማህተም ነው፡፡

ዛሬ አዲስ አበባ ጎፋ ሰፈር የምትለው አድዋና ማይጨው የዘመተ የጎፋ ጀግና ጊዜያዊ ማረፊያን ነው፡፡ ሳውላ ክረምቱ ሳይጠባ ጋዜ ማስቃላን የደገሰች መስላ ደምቃ ታየች፡፡ ከመሎ እስከ ኡባ ከዛላ እስከ ደምባ ጎፋ የጎፋ ወጣቶች አንድ ድምጽ አሰሙ፡፡

ስለ ኢትዮጵያ መደመርን አወጁ፤ ለዘመናት ያልተመለሱ ጥያቄዎች በሳውላ አደባባዮች በመፈክር ደምቀው ወጡ፡፡ የጎፋ ጥያቄ መሠረተ ልማት ነው፡፡ የጎፋ ጥያቄ የራስ አስተዳደር ጥያቄ ነው፡፡

በኢትዮጵያ የጎፋን ሕዝብ ያህል ቁጥር የሌላቸው በርካታ ዞኖች ተፈጥረዋል፡፡ ጎፋ ይሄንን የተነፈገ ህዝብ ነው፡፡ ይሄንን መጠየቅ ወሮበላ ተቆጣጥሮት በነበረው የደኢህዴን መዋቅር ወንጀል ሆኖ ኖሯል፡፡

ጎፋ መስቀሉን እንኳን በወግ እንዳያከበር በደገሰ ዋዜማ ግምገማ ተብሎ የሚጠራ ህዝብ ነው፡፡ የጎፋን መገፋት አብሬ ኖሬ ያየሁ ነኝ፡፡ ከዶክተር አብይ ጎን ነን ያሉ ጎፋዎች ከደጋዋ ቡልቂ እስከ ቆላማዎቹ የጎፋ መንደሮች ሆ ብለው ወጥተው ታይተዋል፡፡ ፍቅርን ገልጸው ፍትሕ ጠይቀዋል፡፡

ጸሐይዋ ደመናውን እየገለጸች ነው፡፡ ታላቅ ነገር በጎፋ ምድር ላይ እንደሚሆን አምናለሁ፡፡ ልበ ብሩህ የባህል አባቶች፣ ደጋግ እናቶች፣ ሰው መውደድ የማይታክታቸው ወጣቶች ጎፋ የደጋጎቹ ምድር፤ ሳውላ ስታዲየም ብሆን ደስ ይለኛል፡፡ ይህን መሳዩ ቀን ናፍቆቴ ነበር፡፡

ከገልጣ ማርያም እስከ ግንድ አንሳ መድሃኒዓለም ይሄንን አየ ዘንድ እንደ ተሳለ ሰው የጎፋን አድባራት አስባለሁ፡፡ ሳውላ አንቺ የኢትዮጵያዊነት መዲና ነሽ፤ ማንም የማይገፋብሽ፤ ማንም የማይነፈቅብሽ፡፡ ነገሽ ገና ብሩሕ ይሆናል፡፡ DireTube

Share your thoughts on this post
%d bloggers like this:
Visit Us On TwitterVisit Us On YoutubeVisit Us On Instagram