የጋዜጠኝነት መምህሩ ፕሮፌሰር አብይ ፎርድ አረፉ

የፊልም፣ የሚዲያና ኮሙዩኒኬሽን ባለሙያ የሆኑት ፕሮፌሰር አብይ ፎርድ ከዚህ አለም በሞት ተለዩ።

ፕሮፌሰር አብይ ፎርድ በአሜሪካ ሀገር ዛሬ ከሰዓት በኋላ ማረፋቸውን የቅርብ ወዳጃቸው እና የሙያ ባልደረባቸው አርቲስት ደሳለኝ ኃይሉ ለፋና ብሮድካስቲንግ ኮርፖሬት ገልጿል።

የቀብር ስነ ስርዓታቸው የትና መቼ እንደሚከናወን ለመወሰነም በቤተሰቦቻቸው ደረጃ እየተመከረ መሆኑ ተነግሯል።

ፕሮፌሰር አብይ በአዲስ አበባ በ1927 ዓመተ ምህረት ነበር የተወለዱት።

ፕሮፌሰር አብይ በአዲስ አበባ ዩኒቨርስቲ የጋዜጠኝነት እና ኮሙዩኒኬሽን የድህረ ምረቃ ትምህርት ቤት ዲን እንዲሁም የዩኒቨርስቲው ፕሬዚዳንት ጽህፈት ቤት ከፍተኛ የዓለም አቀፍ ሚዲያዎች አማካሪ ሆነው አገልግለዋል።

በአዲስ አበባ ዩኒቨርስቲ የፊልም ትምህርት ቤት እንዲከፈት ጥረት ያደረጉት ፕሮፌሰር አብይ ፎርድ፥ የስነ ጥበባትና ፊልም ትምህርት ቤት ልዩ አማካሪና በዩኒቨርስቲው የፊልም ጥናት ክፍል ለመጀመር የተደራጀው ግብረ ሀይል አማካሪ በመሆንም አገልግለዋል።

ፕሮፌሰሩ የመጀመሪያ ደረጃ ትምህርታቸውን እናታቸው ባሰሩት ቤተ-ኡራኤል በኋላም ልዕልት ዘነበወርቅ በተባለው የመጀመሪያ ደረጃ ትምህርት ቤት፤ ሁለተኛ ደረጃ ትምህርታቸውን በሊሴ ገብረ ማሪያም ትምህርት ቤት ተከታትለዋል።

በኋላም የነፃ ትምህርት እድል አግኝተው ወደ አሜሪካ ያቀኑት ፕሮፌሰር አብይ፥ በፓኔ ውድስ ጁኒየር ኮሌጅ በኢለመንታሪ ኢጁኬሽን የመጀመሪያ ዲግሪያቸውን አግኝተዋል።

በኮሎምቢያ ዩኒቨርሰቲ ደግሞ ስኩል ኦፍ ጀኔራል ስተዲስ በፊልም ጥናቶች ሁለተኛ ዲግሪያቸውን ሰርተዋል።

በሃዋርድ ዩኒቨርስቲ የሙሉ ፕሮፌሰርነት ማዕረግ እስካገኙበት ጊዜ ድረስ ለ33 ዓመታት ያህል አገልግለዋል።

በቆይታቸውም በዩኒቨርሰቲው በኮሙዩኒኬሽን ትምህርት ክፍል የሬዲዮ፣ ቴሌቪዥን እና ፊልም ትምህርት እንዲሰጥ አድርገዋል።

በዚህ ክፍል ውስጥም እንደ እነ ፕሮፌሰር ሀይሌ ገሪማ ያሉ ኢትዮጵያውያን በዩኒቨርስቲው እንዲያስተምሩ ከፍተኛ ሚና ተጫውተዋል።

ፕሮፌሰር አብይ ፎርድ የፓን አፍሪካኒዝም አቀንቃኝ ሲሆኑ፥ ወላጆቻቸው በ1923 የንጉሱ የዘውድ በዓልን ለማክበር እና ኢትዮጵያን ለመርዳት ከመጣው የካሪቢያን ቡድን ጋር አብረው ወደ ኢትዮጵያ መግባታቸው ይታወሳል።

ወላጆቻቸውም በሁለተኛው የጣሊያን ወረራ ወቅት በሀገር ፍቅር ስሜት የታገሉ ቆራጥ ቤተሰቦችና የኢትዮጵያ የቁርጥ ቀን ባለውለታ መሆናቸው ይነገራል።

ሐበሻ ታይምስ ለቤተሰቦቻቸው፣ ለወዳጆቻቸውና ለስራ ባልደረቦቻቸው መጽናናትን ይመኛል።

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram