fbpx

የደኢህዴን ስራ አስፈጻሚ ኮሚቴ በክልሉ ወቅታዊ ሁኔታ ላይ አስቸኳይ ውይይት በማድረግ ውሳኔዎችን አሳለፈ

የደቡብ ኢትዮጵያ ህዝቦች ዴሞክራሲያዊ ንቅናቄ/ደኢህዴን/ ሥራ አስፈፃሚ ኮሚቴ በክልሉ ወቅታዊ የሠላምና ደህንነት ሁኔታ ላይ አስቸኳይ ምክክርና ውይይት በማድረግ የተለያዩ ውሳኔዎችን አሳልፏል።

በክልሉ አንዳንድ አካባቢዎች ሀዋሳ ከተማ፣ ሲዳማ ዞን አንዳንድ ወረዳዎች፣ ወላይታ ዞን ሶዶ ከተማ፣ ጉራጌ ዞን ወልቂጤ ከተማ በተፈጠሩ የፀጥታ ችግሮች ህይወታቸውን ላጡ፣ የአካል መጉደል ለደረሰባቸውና ንብረት ለጠፋባቸው ሥራ አስፈፃሚው የተሠማውን ከፍተኛ ሀዘን ገልጿል።

የትኛውም ጥያቄ የግጭት መነሻ መሆን የለበትም፤ ከግጭትና ትንኮሳ የትኛውም የህብረተሰብ ክፍል የሚያተርፈው ነገር የለም ነው ያለው ስራ አስፈፃሚ ኮሚቴው በመግለጫው።

የሀዋሳ ከተማን ጨምሮ በአሁኑ ወቅት በክልሉ አንዳንድ አካባቢዎች የተከሰተው አለመረጋጋት፣ ግጭት፣ የሠው ህይወት መጥፋትና ንብረት መውደም አዝማሚያ በፍጥነት መቆም እንዳለበት ሥራ አስፈፃሚ ኮሚቴ አቅጣጫ ማስቀመጡን ገልጿል።

በመሆኑም የህዝቡን ሠላምና ደህንነት የሚያስጠብቅ ህገ መንግሥታዊ ተልዕኮ የተሰጣቸው የፀጥታ አካላት የጀመሩትን ሥራ በከፍተኛ የህዝባዊ ውግንና አጠናክረው እንዲቀጥሉ፣ አመራሩ፣ አባሉና መላው ህዝቡ ለስኬቱ በጋራ እንዲረባረቡ ድርጅቱ ጥሪውን አቅርቧል።

እያንዳንዱ ዜጋ የራሱንና የአካባቢውን ሠላም ማስጠበቅ እንደዚሁም መላው ህዝብ አስተማማኝ ሠላም እንዲሠፍን የጀመረውን ትግል አጠናክሮ እንዲቀጥልና ከመንግስት ጐን እንዲቆም ለህዝቡ አሳስቧል።

የዜጎች ደህንነት የመጠበቅ ጉዳይ ልዩ ትኩረት ተሠጥቶት እንዲሠራ ሥራ አስፈጻሚው መወያየቱን የገለጸ ሲሆን፥ ዜጎችም ትብብር እና ድጋፋ እንዲያደርጉ ጠይቋል።

ከኦሮሚያ አጐራባች ዞኖች ጋር የሚዋሰኑ የክልሉ አካባቢዎች በተለይ ጌዲኦ ዞን አካባቢ የተፈጠረውን የህዝብ መፈናቀል ወደ ነበረበት ሁኔታ ለመመለስ ድርጅቱ የጀመረውን ተግባር ከኦሮሚያ ክልላዊ መንግሥትና ፌዴራል መንግስት ጋር አጠናክሮ እንደሚቀጥል ሥራ አስፈጻሚ መምከሩን አስታውቋል።

በተመሳሳይ መንገድ በሰገን አካባቢ ህዝቦች ዞን ውስጥ ያሉ የቡርጂና አማሮ ወረዳዎች ውስጥ የሚታየውን የፀጥታ ችግር በዘላቂነት ለመፍታትም ከሚመለከታቸው የክልልና ፌዴራል መንግሥት አካላት ጋር በመሆን ልዩ ርብርብ ለማድረግም ስራ አስፈጻሚው አቅጣጫ አስቀምጧል።

በመጨረሻም የህግ የበላይነት የማስከበርና የህዝቡን ደህንነት የማስጠበቅ ሥራ ተጠናክሮ መቀጠል እንዳለበት ጠንካራ አቅጣጫ ማስቀመጡን በመግለጫው ያስታወቀ ሲሆን፥ የሚመለከታቸው አካላት በከፍተኛ የህዝብ ውግንና እንዲንቀሳቀሱም አሳስቧል።

Share your thoughts on this post
%d bloggers like this:
Visit Us On TwitterVisit Us On YoutubeVisit Us On Instagram