የከፍተኛ ትምህርት ተቋማት መተዳደሪያ እና መቋቋሚያ አዋጅ እየተሻሻለ ነው

የከፍተኛ ትምህርት ተቋማት መተዳደሪያ እና መቋቋሚያ አዋጅ እየተሻሻለ መሆኑን የትምህርት ሚኒስቴር አስታወቀ።

በኢትዮጵያ በመንግስት የሚተዳደሩ ከ40 በላይ ከፍተኛ የትምህርት ተቋማት ይገኛሉ።

ከፍተኛ የትምህርት ተቋማቱ በቁጥር ይህን ያህል በዝተው ተደራሽ ለመሆን ቢሞክሩም፥ ትውልድ ከመቅረጽና የተቋቋሙበትን አላማ ከማሳካት አንጻር ግን ችግር እንደሚስተዋልባቸው ይነገራል።

በተቋማቱ የሚስተዋለው ችግርም እየታየ ላለው የትምህርት ጥራት ችግር መንስኤ መሆኑን ነው አስተያየት ሰጭዎቹ የሚናገሩት።

ትምህርት ሚኒስቴር በበኩሉ በተቋማቱ ላይ የሚስተዋሉ ክፍተቶችን በሚፈታ መልኩ የከፍተኛ ትምህርት አዋጅ የማሻሻል ስራ እየሰራሁ ነው ብሏል።

አዋጁ የከፍተኛ ትምህርት ተቋማት እንዴት መቋቋም አለባቸው ከሚለው ማሻሻያ ጀምሮ እየተሰራ መሆኑን የትምህርት ሚኒስትር ዲኤታው ዶክተር ሳሙኤል ክፍሌ ተናግረዋል።

በተቋማቱ የሚከፈቱት የትምህርት መርሀ ግብሮች ከሀገሪቱ ኢኮኖሚ ጋር አብረው መሄድ እንዳለባቸው የሚያሳይ አስገዳጅ ሁኔታም በማሻሻያው ተካቷል ነው ያሉት።

ከዚህ ባለፈም ለትምህርት ጥራት መሳካት ሁሉም ባለድርሻ አካላት ሃላፊነታቸውን መወጣት እንዳለባቸው የሚያደርግ አስገዳጅ ሁኔታ የያዘ መሆኑንም አንስተዋል።

የከፍተኛ ትምህርት አግባብነት እና ጥራት ኤጀንሲ ዋና ዳይሬክተር አቶ ቢኒያም ተወልድ በበኩላቸው፥ አዋጁ የትምህርት ጥራትን ከማስጠበቅ አንጻር ከፍተኛ ጠቀሜታ እንደሚኖረው ነው የሚናገሩት።

አዋጁ ጥራት የሚታይበት፣ የሚመዘንበት፣ ተማሪነት ላይ የሚያተኩር ነውም ይላሉ ዳይሬክተሩ።

ተቋማቱ ከአካባቢው ህብረተሰብ ጋር በሚፈለገው ደረጃ ትስስር እንዲፈጥሩ እና የሚፈለገውን የትምህርት ጥራት ለማምጣት ያግዛልም ብለዋል አቶ ቢኒያም።

አዋጁ በቀጣዩ በጀት አመት መጀመሪያ በፓርላማ ፀድቆ ወደ ትግበራ ይገባል ተብሎ ይጠበቃል።

በዙፋን ካሳሁን – ኤፍ ቢ ሲ

Share your thoughts on this post