የኤርትራው ፕሬዝዳንት ኢሳያስ አፈወርቂ ሙሉ የአቀባበል ፕሮግራም (የተቀረፀ)

በኤርትራው ፕሬዝዳንት ኢሳያስ አፈወርቂ የተመራው የልዑካን ቡድን በአዲስ አበባ ቦሌ አለም አቀፍ አውሮፕላን ማረፊያ ሲደርስ ጠቅላይ ሚኒስትር ዶ/ር ዐብይ አህመድ አቀባበል አድርገውላቸውል፡፡
የክልል ርዕሳነ መስተዳድሮችም በአቀባበል ስነ ስርዓቱ ላይ ተገኝተዋል፡፡
ከፍተኛ የመንግስት የስራ ኃላፊዎች፣የሀይማኖት አባቶች፣የሀገር ሽማግሌዎች ፣አርቲስቶችም በአቀባበል ስነ ስርዓቱ ላይ ታድመዋል፡፡

ኤርትራው ፕሬዘዳንት ኢሳያስ አፈወርቂ የተመራው የልዑካን ቡድን በፕሬዝዳንት ዶ/ር ሙላቱ ተሾመ በብሄራዊ ቤተ መንግስት ደማቅ አቀባበል ከተደረገለት በኋላ የምሳ ግብዣም ተደርጎለታል፡፡

ፕሬዘዳንት ኢሳያስ አፈወርቂ ዕለቱ ታሪካዊ ቀን መሆኑን እና በተደረገላቸው መንግስታዊና ህዝባዊ አቀባባል መደሰታቸውን ተናግረዋል፡፡

“ከዚህ በኋላም የኢትዮጵያና የኤርትራ ሕዝቦች ሁለት ሕዝቦች ናቸው ብሎ የሚያስብ እውነታውን ያልተረዳ ነው” ሲሉም ተደምጠዋል፡፡

ፕሬዝዳንት ኢሳያስ አፈወርቂ ከኢትዮጵያ መንግስት በኩልም በአርቲስት ለማ ጉያ የተሰራ የራሳቸው ምስል ጨምሮ ሌሎች ባህላዊ ስጦታዎች ተበርክቶላቸዋል፡፡

ጠቅላይ ሚኒስትር ዶ/ር አብይ በበኩላቸው ለፕሬዝዳንት ኢሳያስ አፈወርቂ አቀባበል ለማድረግ የወጣውን ህዝብ አመስግነዋል፡፡

“24 ሰአት ብንሰራለት፣ ደማችንን ብናፈስለት የሚያንሰው ህዝብ ፤ ምንም ሳናደርግለት እንደዚህ ለወደደን፣ ፍቅሩን ለገለፀልን… ህዝብ ምስጋና ይገባዋል፡፡”

በአቀባባልና እና በምሳ ግብዣ ስነ ስርዓቱ ላይ የቀድሞው የኢፌዲሪ ፕሬዝዳንት ዶ/ር ነጋሶ ጊዳዳና የቀድሞው ጠቅላይ ሚኒስትር አቶ ኃይለማርያም ደሳለኝ ጨምሮ ከፍተኛ የመንግስት የስራ ኃላፊዎች፣የሐይማኖት አባቶች፣የኪነ ጥበብ ባለሙያዎችና የተለያዩ የህብረተሰብ ክፍሎች ታድመዋል፡፡

ፕሬዝዳንት ኢሳያስ አፈወርቂ ከቀትር በኋላ ወደ ሀዋሳ በማቅናት የሀዋሳ ኢንዱስትሪ ፓርክን ጨምሮ በከተማ የስራ ጉብኝት አድርገዋል፡፡

በአዲስ አበባ ጎዳናዎች ለኤርትራ ልዑካን ቡድን አቀባባል ለማድርግ የወጡ የአዲስ አበባና አጎራብች ከተማ ነዋሪዎች ደስታቸውን በተለያዩ መንገዶች ገልፀዋል፡፡

የኢትዮጵያና የኤርትራን ሰንደቅ ዓላማዎች ይዞ ከመውጣት ጀምሮ የተለያዩ መፈክሮችንና ዝማሬዎችን ሲያሰሙ ተስተውሏል፡፡


እሁድ ምሽት በሚሊንየም አዳራሽ 25 ሺህ ህዝብ በተገኘበት ንግግር ያደርጋሉ ተብሎ ይጠበቃል፤የህዝብ ለህዝብ ትስስርን የሚያሳዩ ዝግጅቶችም ይቀርባሉ፡፡

 

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram