የአዲስ አበባ ፖሊስ ኮሚሽን ለኢድ አልፈጥር በዓል ዝግ የሚሆኑ መንገዶችን ይፋ አደረገ

የአዲስ አበባ ፖሊስ ኮሚሽን ለኢድ አልፈጥር በዓል ሲከበር በአዲስ አበባ ስታዲየም አካባቢ ዝግ የሚሆኑ መንገዶችን ይፋ አድርጓል።

የበዓሉ አከባበር ተጀምሮ እስከሚያልቅ ድረስም በአዲስ አበባ ስታዲየም አካባቢ ያሉ መንገዶች ዝግ እንደሚደረጉ ነው ኮሚሽኑ ያስታወቀው።

በዚህም መሰረት፦

  • ከአራት ኪሎ በቤተ መንግስት ወደ ስታዲዮም የሚወስደው መንገድ
  • ከሰንጋ ተራ በጥቁር አንበሳ ወደ ብሄራዊና ስታዲየም የሚወስደው መንገድ
  • ከለገሃር ወደ ሜክሲኮ የሚወስደው መንገድ
  • ከብሄራዊ ትያት ለገሀር መብራት ወደ ስታዲየም የሚወስደው መንገድ
  • ከሃራምቤ ሆቴል በጋንዲ ሆስፒታል ወደ መስቀል አደባባይ የሚወስደው መንገድና ሌሎች ሌሎች መስቀል አደባባይን የሚያቋርጡ መንገዶች በበዓሉ እለት ለትራፊክ ዝግ እንደሚሆኑ የአዲስ አበባ ፖሊስ ኮሚሽን አስታውቋል ።

የአዲስ አበባ ፖሊስ ኮሚሽን አክሎም የረመዳን ፆም ፍቺ በዓል በሰላም እንዲከበር አስፈላጊውን የደህንነት ዝግጅት ማድረጉን አስታውቋል።

የኮሚሽኑ የህዝብ ግንኙነት ሃላፊ ኮማንደር ፋሲካ ፈንታ ለኢዜአ እንዳስታወቁት በዓሉን በማስመልከት “ከእምነቱ ተከታዮችና ሌሎች ከሚመለከታቸው አካላት ጋር በቅንጅት ለመስራት ዝግጅቱን አጠናቀናል” ብለዋል።

በዓሉ አርብ ወይም ቅዳሜ ይከበራል ተብሎ የሚጠበቅ ሲሆን በተለይም በፖሊስ ሊደረጉ የሚገቡ የቁጥጥር፣ የፍተሻና ሰላማዊ እንቅስቃሴ እንዲኖር ምቹ ሁኔታዎችን ለመፍጠር በቅንጅት ለመስራት በቂ ዝግጅት መደረጉን ተናግረዋል።

ህዝበ ሙስሊሙ በዓሉን ለማክበር ወደ እምነት ተቋማት በሚሄድበት ወቅትም የመኖሪያ ቤቱን ደህንነት ለመጠበቅ ቅድመ ዝግጅቶችም ተደርገዋል ብለዋል።

በዓሉን በሰላም ለማክበርም ህዝበ ሙስሊሙና ሌላው ማህበረሰብ ማንኛቸውንም ወንጀል ነክና ለደህንነት አጠራጣሪ የሆኑ ነገሮችን ለአካባቢው ፖሊስ በመጠቆም የተለመደ ትብብራቸውን እንዲያደርጉም ጥሪ አቅርበዋል ኮማንደር ፋሲካ።

Share your thoughts on this post