የአዲስ አበባ ቀላል ባቡር አገልገሎት ከከተማ አስተዳደሩ የ1 ነጥብ 5 ቢሊየን ብር ድጎማ ጠየቀ

የአዲስ አበባ ቀላል ባቡር አገልገሎት ከአዲስ አበባ ከተማ አስተዳደር የ1 ነጥብ 5 ቢሊየን ብር የድጎማ በጀት ጠየቀ።

አገልገሎቱ ለባቡር መለዋወጫ እቃዎች ግዥ እና ለሌሎች አስተዳደራዊ ወጪዎች የሚልው ድጎማ ነው ከአስተዳደሩ የጠየቀው።

የአዲስ አበባ ቀላል ባቡር የመዲናዋን የትራንስፖርት እጥረት በመቀነስ ረገድ የራሱን ሚና ቢጫወትም እያደገ ከመጣው የመዲናዋ ነዋሪ አንፃር ራሱን ማሻሻል አልቻለም።

በኤሌክትሪክ ሀይል መቋረጥ ምክንያት መሀል የባቡር ሀዲድ ላይ የሚቆሙ ባቡሮችን መመልከት እየተለመደ ሲሆን፥ አንድ ባቡር ሄዶ ሌላኛው እስኪመጣ የሚወስደው ጊዜ ልዩነትም ቀላል የሚባል አይደለም።

ፋና ብሮድካስቲንግ ኮርፖሬት ከዚህ ቀደም ባደረገው ምልከታም፤ ከተጠቀሱት ችግሮች ባሻገር ትኬት ሳይቆርጡ የሚሳፈሩ መንገደኞች መበራከትን በተደጋጋሚ አንስቷል።

የአዲስ አበባ ቀላል ባቡር ትራንዚት ስራ አስኪያጅ አቶ ሙሉቀን አሰፋ፥ እንደሚባለው ባይሆንም ትኬት ሳይቆርጡ የሚጓዙ ሰዎች እንዳሉ ይናገራሉ።

ስራ አስኪያጁ ለዚህ ችግር በዋናነት ያነሱት የሰው ሀይል እጥረትን ነው።

“በሙሉ አቅም የትኬት ቁጥጥር ለማድረግ 280 ሰራተኞችን ይጠይቃል፤ ነገር ግን ትኩረታችን በትንሽ ትኬት ቆራጮች 55 በመቶ ተጠቃሚ የሚበዛባቸውን ጣቢያዎች ተደራሽ ማድረግ ነው” ብለዋል አቶ ሙሉቀን።

በዋናነት ግን የህዝቡን የባለቤትነት ስሜት ለማሳደግ እና የቁጥጥር የሰው ሀይሉን ለማጠናከር እየተሰራ መሆኑን ይገልጻሉ።

የቀላል ባቡሩ እስከያዝነው ሰኔ ወር መጀመሪያ 37 ነጥብ 5 ሚሊየን ሰዎችን በማጓጓዝ 102 ሚሊየን ብር ከትኬት ሰብስቧል።

ይህ ገንዘብ ግን የአዲስ አበባ ቀላል ባቡርን ከድጎማ በጀት ከመጠየቅ አላዳነውም።

አገልግሎቱ የ1 ነጥብ 5 ቢሊየን የበጀት ማሟያ ድጎማ እንዲደረግለት ለአዲስ አበባ ከተማ አስተዳደር ጥያቄ አቅርቧል።

የቀላል ባቡር ትራንዚት ስራ አስኪያጅ አቶ ሙሉቀን አሰፋ እንደሚሉት፥ ከተጠየቀው የድጎማ በጀት ውስጥ ወደ 1 ነጥብ 1 ቢሊየን ብር የሚሆነው ለባቡር መለዋወጫ እና ሌሎች እቃዎች ግዥ የሚውል ነው።

ቀሪው ገንዘብ ደግሞ ከትኬት ገቢ ከሚገኘው ገቢ ውጭ ለሚያስፈልጉ የተለያዩ አስተዳደራዊ ወጪዎች እንዲውል የታሰበ ነው።

ትራንዚት ስራ አስኪያጁ አቶ ሙሉቀን፥ የአዲስ አበባ ከተማ አስተዳደርም ይህንን የቀላል ባቡሩን ስራ ለማቀላጠፍ እንደ ሌሎች የአውሮፓ እና አሜሪካ ከተሞች ሁሉ ድጎማ ሊያደርግ ይገባል ብለዋል።

ባለፈው ሳምንት ለከተማ አስተዳደሩ የቀረበው የድጎማ በጀት ጥያቄ ምላሽ ሲያገኝም ለቀጣይ ሁለት እና ሶስት አመታት የባቡር መለዋወጫ እቃዎች እጥረት ይፈታል ተብሎ ታምኖበታል።

አቶ ሙሉቀን፤ በቀጣይ ገቢውን ከፍ ለማድረግ የተለያዩ ስራዎች እየተሰሩ ነው ያሉ ሲሆን፥ በዚህም የክፍያ አየነቱን ለመቀየር ታስቧል ብለዋል።

የክፍያ አይነቱን ለመቀየር የሚያስችል ረቂቅ ሰነድም ውይይት ተደርጎበት ለትራንስፖርት ሚኒስቴር መላኩን አንስተዋል።

የሚደረገው ማሻሻያ የአጭር ርቀት ተጓዦችን የባቡር ተጠቃሚነት የማያበረታታ ሲሆን፥ ከየትኛውም ቦታ ለሚነሳ ተጓዥ ተመሳሳይ ክፍያ የሚጠይቅ ነው።

ትራንዚት ስራ አስኪያጁ አቶ ሙሉቀን አክለውም፥ እስከ መስከረም ወርም ተጨማሪ 5 ባቡሮችን ወደ ስራ ለማስገባት ቡን አስታውቀዋል።

ይህም አንዱ ባቡር ሄዶ ሌላኛው የሚመጣበትን ጊዜ ከ15 ወደ 12 ደቂቃ ዝቅ ያደርገዋል ነው ያሉት አቶ ሙሉቀን አሰፋ።

በፋሲካው ታደሰ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram