የትግራይ ክልል ምክር ቤት በሚቀጠለው ሳምንት አስቸኳይ ጉባዔውን ሊያካሂድ ነው

የትግራይ ክልል ምክር ቤት በሚቀጥለው ሳምንት ግንቦት 15 እና 16 ለሁለት ቀናት የሚቆይ አስቸኳይ ጉባዔውን ያካሂዳል፡፡

በዚህ ጉባዔ ሁለት ረቂቅ አዋጆችን ምክር ቤቱ መርምሮ ያጸድቃል ተብሎ ይጠበቃል፡፡

የምክር ቤቱ ጽህፈት ቤት በሰጠው መግለጫ እንዳስታወቀው ምክርቤቱ በሚያካሂደው 5ኛ ዘመን 4ኛ አስቸኳይ ጉባዔ ከሚያጸድቃቸው አዋጆች አንዱ የትግራይ ብሄራዊ ክልላዊ መንግስት የስታስቲክስ ኤጀንሲ ለማቋቋም ያለመ ረቂቅ አዋጅ ነው፡፡

ይህ አዋጅ የክልሉ አሀዛዊ የመረጃ ስርዓት በማደራጀት ቀልጣፋ እንዲሁም የተደራጀ እና ሳይንሳዊ መረጃ እንዲኖር የሚያግዝ ነው ተብሏል፡፡

በተጨማሪም ቀልጣፋ አስተዳደራዊ ጉዳዮችን፣ ፖሊሲዎችን እንዲሁም ሌሎች የምርምር ስራዎችን በሚያግዝ መልኩ መረጃዎችን ለመሰብሰብ እና ለመተንተን ከፍተኛ ሚና ይኖረዋል ተብሎ ታምኖበታል፡፡

በዚህም ረቂቅ አዋጁ በምክር ቤቱ አባላት ተመርምሮ ይጸድቃል ተብሎ ይጠበቃል፡፡

ሁለተኛ ይጸድቃል ተብሎ የሚጠበቀው አዋጅ ደግሞ የጥናትና ምርምር ማዕከል ኤጀንሲ ለማቋቋም ያለመ አዋጅ ነው፡፡

ይህ ደግሞ በክልሉ የሚተገበሩ ፖሊሲዎችና ስትራቴጂዎች ውጤታማ እንዲሆኑ ያግዛል፡፡

ከዚህ ባለፈም የክልሉ የተለያዩ ምሁራን ተደራጅተው በአንድ ማዕከል ጥናታቸውን እንዲያካሂዱ የሚረዳ ሲሆን፥ በዚህም የህብረተሰቡን ችግሮች የሚፈቱበት መንገድ እንደሚመቻችም ተገልጿል፡፡

 

 

ምንጭ፦ድወት

Share your thoughts on this post