የትግራይ ክልል መንግስት በክልሉ ለሚገኙ የእግር ኳስ ክለቦች የ5 ሚሊየን ብር ድጋፍ አደረገ

የትግራይ ብሄራዊ ክልላዊ መንግስት በሀገር አቀፍ ደረጃ በእግር ኳስ ውድድሮች በመሳተፍ ላይ ለሚገኙ የክልሉ ክለቦች 5 ሚሊየን ብር ድጋፍ አደረገ።

የክልሉ ወጣቶችና ስፖርት ጉዳይ ቢሮ ኃላፊ አቶ ነጋ አሰፋ እንዳሉት የክልሉ መንግስት የገንዘብ ድጋፉን ያደረገው በኢትዮጵያ ፕሪሚየር ሊግ፣ ከፍተኛ ሊግና ብሄራዊ ሊግ በመሳተፍ ላይ ለሚገኙ ክለቦች ነው።

በዚሁ መሠረት በኢትዮጵያ ፕርሜየር ሊግ በመሳተፍ ላይ ለሚገኙ የመቀሌ ከተማና ወልዋሎ ዓዲግራት ዩኒቨርሲቲ እንዲሁም በከፍተኛ ሊግ በመጫወት ላይ ለሚገኙ ስሑል ሽረና ሓወልቲ አክሱም ክለቦች ለእያንዳንዳቸው 1 ሚሊየን ብር ድጋፍ ተደርጎላቸዋል።

በብሄራዊ ሊግ ደረጃ በመሳተፍ ላይ ለሚገኙት ዋልታ ፖሊስ፣ ራያ ዓዘቦ፣ ትግራይ ውሃ ኢንተርፕራይዝና ሶሎዳ ዓድዋ ክለቦች ደግሞ ለእያንዳንዳቸው 250 ሺህ ብር ድጋፍ ተበርክቶላቸዋል።

የመቀሌ ከተማ እግር ኳስ ክለብ ቡድን መሪ አቶ ሽፈራው ተክለሃይማኖት፥ “የክልሉ መንግስት ክለቡን ለማጠናከር ያደረገው ድጋፍ በፕሪሚየር ሊጉ እያደረግን ላለው ፉክክር የሞራል ስንቅ ይሆነናል”ብለዋል።

በተያያዘ ዜና በክልሉ የሚገኙ የእግር ኳስ ክለቦችን በገንዘብና በቁሳቁስ በመደገፍና በማጠናከር የላቀ ተሳትፎ ላደረጉ የክልሉ ባለሃብቶችም የእውቅናና የምስጋና የምስክር ወረቀት ዛሬ ተሰጥቷቸዋል።

የምስጋናና የእውቅና የምስክር ወረቀት የተሰጠው በልዩ ልዩ ስፖርታዊ ውድድሮች ለሚሳተፉ ስፖርተኞች ድጋፍ ሲያደርጉ ለቆዩ 117 ባለሀብቶች ነው።

ምንጭ፦ ኢዜአ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram