የተንቀሳቃሽ ስልክ ቴክኖሎጂ ሃገራችን ከመግባቱ በፊት ከሰው ጋር የምንገናኝበት መንገድ ትውስ አይላችሁም?

በአዲስ አበባ ሳይቀር የመደበኛ ስልክ በውስን ቤቶች መገኘት ግንኙነቶቻችን ስልክ ባላቸው ጎረቤቶቻችን ቤት እንዲሆን ያሰገደደበት ሁኔታ ነበር ፡፡

ይህ የቅርብ ጊዜ ትዝታ ተቀይሮ አሁን በተንቀሳቃሽ ስልኮቻችን ግንኙነታችንን ከማቀላጠፍ ባሻገር በመረጃ “አለምን በእጃችን ይዘን እንደመዞር” ሆኗል፡፡

ይሄን አስመልክቶ ትዝታቸውን ያጋሩን የጉለሌ ክፍለ ከተማ ነዋሪዋ ወይዘሮ ፋንቱ በየነ ከ10 አመት በፊት ከቤተሰቦቻቸው ለመገናኘትና ጉዳዮቻቸውን ለማስፈፀም “ጎረቤት አስቸግር ነበር” ነው ያሉት፡፡

“የተንቀሳቃሽ ስልክ ተጠቃሚ በመሆኔ ሚስጥሬን መጠበቅና በፈለኩት ሰአት ሰዎችን ለማግኘት ችያለሁ ”ባይ ናቸው፡፡

የተንቀሳቃሽ ስልክ ቴክኖሎጂ ተደራሽ እንዲሆን በመደረጉ ህብረተሰቡ አቅሙን ባገናዘበ መልኩ እንዲጠቀም ማስቻሉንም ገልጸዋል፡፡

የመንግስት ሰራተኛው አቶ ምትኩ አበበ በበኩላቸው የተንቀሳቃሳሽ ስልክ ወደ ሃገሪቱ ከገባ ጀምሮ እየተጠቀሙ መሆኑን ገልፀው ግንኙነታቸውን ከማቀላጠፍ ባሻገር ወቅታዊ መረጃዎችን ለማግኘት እንደጠቀማቸውም ነው የተናገሩት፡፡

የአዲሱ ገበያ አካባቢ ነዋሪዋ ወይዘሪት እመቤት ባንተይሁን በበኩሏ ተንቀሳቃሽ ስልክ ግንኙነቶቿን እንዳቃለለላት ገልፃ ከተማሪነት ጊዜዋ ጀምሮ ደጋፊ መፅሃፍትንና መረጃዎችን በቀላሉ ለማግኘት እንደምትጠቀምበት ተናግራለች፡፡

ሆኖም ቴክኖሎጂው ያመጣውን ፀጋ በተለይም ማህበራዊ ሚዲያውን አብዛኛው ሰው በኃላፊነት እየተጠቀመበት አለመሆኑንም ሳትጠቅስ አላለፈችም፡፡

የቂርቆስ ክፍለ ከተማ ነዋሪው አቶ ስንታየሁ ጌታቸው በበኩላቸው “አሁን የደረስንበት ዘመን ሰው ቤቱ ቁጭ ብሎ ገበያ የሚገበያይበትና አለምን የሚረዳበት ዘመን ሆኗል” ይላሉ፡፡

ወጣት ትንሳኤ ተስፋየም አንዳንድ ስራዎች የሚሰሩትም ሆነ የሚያልቁት በስልክ እንደሆነ ገልፆ ተንቀሳቃሽ ስልክ ህልውና እየሆነ መጥቷል ይላል።
“የድሮ ሰዎች ቀጠሮ የሚይዙትና የሚገናኙት ግን እንዴት ነው?” ብሎ የሚጠይቀው ወጣቱ የዚህ ዘመን ትውልድ ነገሮች ቀለውለታል ፣በአግባቡ የመጠቀምም ኃላፊነት አለበት ብሏል፡፡

በአሁኑ ወቅት በመላው አገሪቱ የተንቀሳቃሽ ስልክ ተጠቃሚ ቁጥር 64 ሚሊዮን መድረሱንና 85 ነጥብ 5 በመቶ በላይ የአገሪቷ የቆዳ ሽፋን የተንቀሳቃሽ ስልክ አገልግሎት እንዲያገኝ የሚያስችል መሰረተ ልማት መዘርጋቱን መረጃዎች ያመለክታሉ።

ENA

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram