fbpx

የተባበሩት አረብ ኤምሬቶች ልዑል አልጋወራሽ ሼክ መሀመድ ቢን ዛይድ አል ነኸያን ለይፋዊ የስራ ጉብኝት አዲስ አበባ ገቡ

የተባበሩት አረብ ኤምሬቶች ልዑል አልጋወራሽ ሼክ መሀመድ ቢን ዛይድ አል ነኸያን በኢትዮጵያ ይፋዊ የስራ ጉብኝት ለማድረግ አዲስ አበባ ገቡ፡፡

የኢፌዲሪ ጠቅላይ ሚኒስትር ዶክተር አብይ አህመድ ቦሌ ዓለም አቀፍ አውሮፕላን ማረፊያ በመገኘት ለልዑል አልጋወራሽ ሼክ መሀመድ አቀባበል አድርገውላቸዋል፡፡

በጠቅላይ ሚኒስትሩ ግብዣ አዲስ አበባ የመጡት ሼክ መሀመድ ቢን ዛይድ አል ናኸያን ለክብራቸው ሃያ አንድ ጊዜ መድፍ ተተኩሷል።

ሼክ መሀመድ ቢን ዛይድ አል ነኸያን በኢትዮጵያ የስራ ጉብኛት የሚያደርጉት ለሁለት ቀናት ነው ተብሏል።

በሚኖራቸው የሁለት ቀናት ቆይታም ከኢፌዴሪ ፕሬዚዳንት ዶክተር ሙላቱ ተሾመ እና ጠቅላይ ሚኒስትር ዶክተር አብይ አህመድ ጋር ተገናኝተው እንደሚወያዩ ይጠበቃል።

የሁለትዮሽ ጉዳዮች እና አካባቢያዊ ሁኔታዎችም የውይይታቸው አካል እንደሚሆን ተነግሯል።

ሼክ መሀመድ ቢን ዛይድ አል ነኸያን በቆይታቸው የአፍሪካ ህብረት ኮሚሽን ሊቀ መንበር ሙሳፋኪ ጋር ይወያያሉ ተብሎም ይጠበቃል።

ከዚህ በተጨማሪም ልዑል አልጋ ወራሹ በኢትዮጵያ በሚኖራቸው የሁለት ቀናት ቆይታ የመስክ ጉብኝትም ያደርጋሉ ነው የተባለው።

ጠቅላይ ሚኒስትር አብይ አህመድ በቅርቡ በተባበሩት አረብ ኤምሬቶች ጉብኝት ማድረጋቸው ይታወሳል።

ጠቅላይ ሚኒስትር ዶክተር አብይ በቆይታቸውም ከተባበሩት አረብ ኤምሬቶች ልዑል አልጋ ወራሽ ሼክ መሀመድ ቢን አል ነኸያን ጋር በአቡ ዳቢ ተወያይተዋል።

በዚህም ወቅት ሁለቱ ሀገራት ወዳጅነታቸውን እና ትብብራቸውን የበለጠ ማጠናከር በሚችሉበት ሁኔታ እንዲሁም በወቅታዊ አካባቢያዊ እና ዓለም አቀፋዊ ጉዳዮች ላይ መምከራቸውም ይታወሳል።

Share your thoughts on this post
%d bloggers like this:
Visit Us On TwitterVisit Us On YoutubeVisit Us On Instagram