fbpx

HT

ሐበሻ ታይምስ ሚዲያ

AMHARIC

የተባበሩት መንግስታት የደቡብ ሱዳን የሰላም ማስከበር ተልዕኮውን አራዘመ

በተባበሩት መንግሥታት የጸጥታው ምክር ቤት የደቡብ ሱደን ሰላም ማስከበር ተልዕኮውን ለተጨማሪ አንድ ዓመት አራዘመ፡፡

የሰላም ማስከበር ተልእኮው እስከ ፈረንጆቹ መጋቢት 15/ 2019 የተራዘመ ሲሆን 17 ሺህ ሰላም አስከባሪ ወታደሮችም የሰላም ማስከበር ተግባራትን ያከናውናሉ፡፡

ምክር ቤቱ  የደቡብ ሱዳኑ የእርስ በእርስ ጦርነት በአስቸኳይ የማያበቃ ከሆነ  የጦር መሳሪያ ማዕቀብን ጨምሮ ሌሎች እርምጃዎችን ሊወስድ እንደሚችልም አስጠንቅቋል፡፡

በአሜሪካ አርቃቂነት  የምክር ቤቱ አባላት በሙሉ ድምጽ ያጸደቁት ሰነድ የደቡብ ሱዳንን ሰላም፣ ጸጥታና ደህንነትን በሚያደናቅፉ አካላት ላይም ጭምር ማዕቀብ የመጣል እርምጃ ሊወሰድ የሚችልበትን አግባብ አካቷል፡፡

ሰነዱ በቀጥታ የጦር መሳሪያ ማዕቀብ ባይጥልም  ስምምነቱን የሚጥሱ ተዋጊዎችን እውቅና መንሳትንና የጦር መሳሪያ ማዕቀብን ጨምሮ ሌሎች አማራጮችን ሁሉ እንደሚጠቀም ያትታል፡፡

በሀገሪቱ የተንሰራፋውን የእርስ በዕርስ ጦርነት ለመቋጨት ተፋላሚ ኃይሎች እኤአ ነሐሴ 2015 የሰላም ስምምነት ቢፈራረሙም አልተገበሩትም፡፡ ባለፈው ታህሳስ  ወር የተፈራረሙትን የተኩስ አቁም ስምምነት ሲጥሱትም በቅጡ 24 ሰዓታትን እንኳ መታገስ አልቻሉም፡፡

ከጦርነቱ ጋር በተያያዘ በ10 ሺህዎች የሚቆጠሩ ዜጎች ህይወታቸውን ያጡ ሲሆን 4 ሚሊዮን ደቡብ ሱዳናውያን ደግሞ ከቤት ንብረታቸው ተፈናቅለዋል፡፡ ከተፈናቃዮች ውስጥ 1 ነጥብ 8 ያህሉ ሀገራቸውን ጥለው የተሰደዱ ናቸው፡፡

የሀገሪቱ የፖለቲካ፣ የደህንነት፣ የኢኮኖሚና የሰብዓዊ ቀውስ እንዲሁም  በሀገሪቱ ፖለቲካዊና ወታደረዊ መሪዎች አማካኝነት የሚፈጸመው ግጭት  ያሳሰበው የጸጥታው ምክር ቤት ለግጭቱ ወታደራዊ እርምጃ መፍትሔ እንደማይሆን አስምሮበታል፡፡

በተባበሩት መንግስታት የደቡብ ሱዳን ምክትል አምባሳደር ጆሴፍ ሙም ማሎክ የሰላም ማስከበር ተልዕኮውን መራዘም በመልካም ጎኑ ቢቀበሉትም  ምክር ቤቱ  የሰላም ማስከበር ሰነዱን  ፖለቲካዊ መልክ ማስያዙን ተችተውታል፡፡

የፕሬዝዳንት ሳልቫ ኪር መንግሥት በምርጫ ስልጣን ላይ ያለ በመሆኑ የሀገሪቱን ፖለቲካዊ ቀውስ ለመፍታት የተባበሩት መንግስታት ከደቡብ ሱዳን መንግሥት ጋር መስራት እንዳለበትም አስገንዝበዋል፡፡

 

africa.cgtn.com/

Share your thoughts on this post
%d bloggers like this:
Visit Us On TwitterVisit Us On YoutubeVisit Us On Instagram