የብሄራዊ መረጃ እና ደህንነት አገልግሎት ከፖለቲካ ወገንተኝነት በፀዳ መልኩ እንደሚንቀሳቀስ ጄኔራል ዳይሬክተሩ አስታወቁ

የብሄራዊ መረጃ እና ደህንነት አገልግሎት ከፖለቲካ ወገንተኝነት በፀዳ መልኩ እንደሚንቀሳቀስና እንደሚሰራ አዲሱ የአገልገሎቱ ዳይሬክተር ጄኔራል አደም መሀመድ አስታወቁ።

በዛሬው ዕለት ዳይሬክተር ጄኔራሉን ጨምሮ አዲሱ የአገልግሎቱ አመራር ከተቋሙ ሰራተኞች እና ባለሙያዎች ጋር ትውውቅ አድርገዋል።

በዚህ ወቅትም ውይይት የተካሄደ ሲሆን፥ ዳይሬክተር ጄኔራል አደም መሀመድ  ህገ መንግስታዊ ስርአቱን ከአደጋ ለመጠበቅ በሚደረገዉ ጥረት ተቋሙ ተልዕኮዉን ሲፈጽም ከፖለቲካዊ ወገንተኝነት በፀዳ መልኩ ሊሆን ይገባዋል ብለዋል።

ተቋሙ የግዳጁን አፈጻጸም ዉጤታማነት ከፍ ለማድረግ መንግስት በሰጠዉ አቅጣጫ መሰረት በተቋሙ ውስጥ የሪፎርም ስራ እንደሚሰራ አመልክተዋል።

ጄኔራል ዳይሬክተሩ ለህዝብ የሚተጋ፣ የሚሰራ እንዲሁም የሀገር እና ህዝብ ጥቅም የሚያስከብርና የሚያስቀጥል ተቋሙ ይደረጋል ብለዋል።

መንግስት በጀመረው የለውጥ ጉዞ ህገ መንግስቱንና ህገ መንግስታዊ ስርዓቱን ከማገልገል አኳያና የተጣለበትን ተልዕኮ ለመወጣት ብቃት ያለው ተቋም እንደሚደረግ ገልፀዋል።

ከዚህ ባለፈ ማንኛውንም ህዝብ እኩል የሚያገለግል ተቋም ለማድረግ አቅጣጫ ተቀምጦ ወደ ስራ እንደተገባ ታውቋል።

በሀብታሙ ተክለ ስላሴ – ኤፍ.ቢ.ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram