የቅዱስ ጴጥሮስ ስፔሻላይዝድ ሆስፒታል በሌሎች ሆስፒታሎች ለቀዶ ህክምና ወረፋ የሚጠባበቁ ታካሚዎችን ተቀበሎ ማስተናገድ ጀመረ

የቅዱስ ጴጥሮስ ስፔሻላይዝድ ሆስፒታል በሌሎች ሆስፒታሎች ለቀዶ ህክምና ወረፋ የሚጠባበቁ ታካሚዎችን ተቀበሎ ማከም መጀመሩን አስታወቀ።

በአዲስ አበባ ከተማ ከሚገኙ የመንግስት ሆስፒታሎች ለቀዶ ህክምና ወረፋ የሚጠብቁ ከ11 ሺህ በላይ ታካሚዎች መኖራቸውን መረጃዎች ይጠቁማሉ።

ከእነዚህ ውስጥ 6 ሺህ የሚሆኑት በጥቁር አንበሳ ቀሪዎቹ ደግሞ በዘውዲቱ እና ሌሎች ሆስፒታሎች ውስጥ ወረፋ ይዘው የሚጠብቁ ናቸው።

ታካሚዎች ወረፋ በመጠበቅ ያለባቸውን ህመም ማስታገስ ሳይችሉ ወደ ከፋተኛ ደረጃ ተለውጦ ለሞት እንደሚዳረጉ ይነገራል።

የቅዱስ ጴጥሮስ ስፔሻላይዝድ ሆስፒታል ሜዲካል ዳይሬክተሩ ዶክተር አየለ ተሾመ፥ ወረፋ በመጠበቅ ሂደት በሽታዎች የመወሳሰብ እና ታማሚውን ለከፋ ጉዳት እየዳረጉ መሆኑን ገልፀዋል ፡፡

በአዲስ አበባ የሚገኙትን ሆስፒታሎች የቀዶ ህክምና ወረፋዎች ለማቃለል እና ታካሚውም ህመሙ የከፋ ደረጃ ሳይደርስበት ህክምና ማግኘት እንዲችል የማድረግ ስራዎችን የቅዱስ ጴጥሮስ ስፔሻላይዝድ ሆሰፒታል መጀመሩ ተገልጿል።

ይህን አገልግሎት ሆስፒታሉ የፈጥኖ ምላሽ ንቅናቄ በሚል ሀሳብ እንደጀመረው አስታውቋል።

ሆስፒታሉ እንዳስታወቀው በወረፋ ምክንያት ህክምና ማግኘት ያልቻሉ ታካሚዎችንም ተቀብሎ ማስተናገድ ከጀመረ ሁለት ሳምንት እንደሆነ አስታውቋል።

ሜዲካል ዳይሬክተር እንደገለፁት ስራው የሌሎች ሆስፒታሎቸን ጫና ለመቀነስ ታስቦ የተጀመረ እና ከየትኛውም ሆስፒታል ወረፋ የሚጠብቁ ታካሚዎችንም ተቀበሎ አገልግሎት መስጠት መጀመሩን ነው የገለፁት።

በሁለት ሳምንት ውስጥም ሆስፒታሉ ከጥቁር አንበሳ ፣ ዘውዲቱ እና መሰል ታካሚ ከሚበዛባቸው ሆስፒታሎች ታካሚዎችን በመውሰድ ከ 100 በላይ ለሚሆኑት የቀዶ ህክምና መስጠት ችሏል።

ከሌሎች ሆስፒታሎች የሚላኩ ተጨማሪ ታካሚዎችንም ለማከም ሆስፒታሉ አስፈላጊ ግብአቶችን በማዘጋጀት ቅድመ ሁኔታዎች ማሟላቱን ነው ዶክተር አየለ የገለፁት።

ሆስፒታሉ የጀመረው ይህ አገልግሎት የሌሎችን ሆስፒታሎች ጫና ከማቃለል በላይ ለታካሚው ፈጥኖ መድረስን የሚያመጣ በመሆኑ በንቅናቄ የተጀመረው ስራ ቀጣይነት እንዲኖረው እየተሰራ እንደሆነም ተነግሯል።

ሜዲካል ዳይሬክተሩ እንደሚሉት ከካንሰር፣ ልብ እንዲሁም ከፍተኛ ባለሙያን ብቻ ከሚጠይቁ ውስን ቀዶ ህክምናዎች ውጭ አብዛኞቹ ቀዶ ህክናዎች እየተሰጡ ናቸው።

ህክምናውን ካገኙት ታካሚዎች መካከል ወ/ሮ ከይላ የሀሞት ከረጢት እብጠት ታማሚ በመሆን ቀዶ ህክምና ለማግኘት ከ አንድ አመት በላይ በዘውዲቱ ሆስፒታል ወረፋ ሲጠብቁ እንደነበር ይናገራሉ።

በአሁን ወቅትም በዚህ አገልግሎት መጀመር ምክንያት ከአመት በላይ ሲጠባበቁት የነበረው የቀዶ ህክምና በቅዱስ ጴጥሮስ ሆስፒታል መፍትሄ ማግኘት ችሏል፡፡

ሆስፒታሉ የህክምና አገልግሎቱ ለታካሚው መፍትሄ የያዘ በመሆኑ እንደ ሀገር የቀጠሮ ስርአቱ ማዕከል ደረጃ ሊያዝ እና ሊመራ ይገባል የሚል ማሳሰቢያን አስተላልፏል።

በዙፋን ካሳሁን

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram