የሴካፋ ሴቶች እግር ኳስ ውድድር የሚጀመርበት ቀን ተራዘመ

በሩዋንዳ አስተናጋጅነት ለ3ኛ ጊዜ ከግንቦት 4 እስከ ግንቦት 14 ቀን 2010 ዓ.ም እንዲካሄድ መርሃ ግብር ተይዞለት የነበረው የምስራቅና መካከለኛው አፍሪካ የሴቶች እግር ኳስ ውድድር ላልተወሰነ ጊዜ ተራዘመ።

የኢትዮጵያ የሴቶች ብሔራዊ ቡድን የሚሳተፍበት የ2018 ውድድር፤ ሴካፋ ውድድሩን ለማዘጋጀት የሚያስፈልገውን ወጪ በተቀመጠለት ጊዜ ለአዘጋጇ ሩዋንዳ ባለመላኩ ውድድሩ ተራዝሟል።

የሩዋንዳ እግር ኳስ ፌዴሬሽን ዛሬ ባወጣው መግለጫ አስፈላጊውን የፋይናንስ ድጋፍ ከሴካፋ ባለማግኘቱ ውድድሩን ለማራዘም መገደዱን አስታውቋል።

ባለፈው ወር ከሴካፋ በተደረገ ስምምነት ውድድሩን ለማስተናገድ የሚስፈልገውን በጀት እንደሚልክ ገልጾ የነበረ ቢሆንም ፌዴሬሽኑ እስካሁን ገንዘቡ እንዳልደረሰው አስታውቋል፡፡

አዘጋጇ ሩዋንዳን ጨምሮ ኢትዮጵያ፣ ኬንያ፣ ታንዛኒያ፣ ቡሩንዲ እና ጅቡቲ በውድድሩ ላይ እንደሚሳተፉ ያሳወቁ ቢሆንም የሩዋንዳ እግር ኳስ ፌዴሬሽን ዛሬ ባወጣው መግለጫ ውድድሩ መቼ እንደሚካሄድ ያሳወቀው ነገር የለም።

በአሰልጣኝ ሰላም ዘርአይ የሚመራው የኢትዮጵያ ሴቶች ብሔራዊ ቡድን ሉሲዎች ለውድድሩ እንዲረዳው ካሳለፍነው ሳምንት ጀምሮ አዲስ አበባ ላይ ዝግጅት መጀመሩ የሚታወስ ነው።

የምስራቅና የመካከለኛው አፍሪካ የክለቦች ማህበራት ምክር ቤት (ሴካፋ) የተለያዩ የአፍሪካ የብሔራዊ ቡድንና የክለቦች ውድድር ለማስተናገድ የፋይናንስ ችግር በስፋት ሲገጥመው ይስተዋላል።

ከሁለት ዓመት በፊት ኡጋንዳ ውድድሩን ካስተናገደች በኋላ የሴካፋ የሴቶች እግር ኳስ ውድድር በበጀት ማጣት ምክንያት መዘግየቱ ይታወሳል።

ምንጭ፦ ኢዜአ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram