የሱዳኑ ፕሬዚዳንት ኦማር ሀሰን አልበሽር የካቢኔ ሹም ሽር አካሄዱ

የሱዳኑ ፕሬዚዳንት ኦማር ሀሰን አልበሽር በትናንትናው እለት አዲስ የካቢኔ ሹም ሽር ማድረጋቸው ተነግሯል።

ፕሬዚዳንቱ ባካሄዱት የካቢኔ ሹም ሽርም አዲስ የውጭ ጉዳይ ሚኒስትርን ጨምሮ የሰባት ሚኒስትሮች እና ስምንት የግዛት አስተዳደሮችን ያካተተ ነው።

በዚህም መሰረት በቅርቡ ከውጭ ጉዳይ ሚኒስትርነት ከተነሱት ኢብራሂም ገሃንዱር ምትክ አል-ዲርዲሪ ሞሀመድ አህመድን የውጭ ጉዳይ ሚኒስትር አድርገው ሾመዋል።

የቀድሞ የፕሬዚዳንቱ ረዳት ኢንራሂም ሞሃሙድ ሀሚድ ደግሞ የሱዳን የሀገር ውስጥ ጉዳይ ሚኒስትር ሆነው ሲሾሙ፥ የቀድሞ የምርጫ ኮሚሽን ኮሚሽነር የነበሩት ሳሊም አህመድ ሳሊም የፍትህ ሚኒስትር ሆነው ተሾመዋል።

አዝሃሪ አብደል ጋዲር ደግሞ የነዳጅ ምርቶች እና ኤክስፖርት ባለስልጣን ሚስትር ሆነው የተሾሙ ሲሆን፥ የቀድሞ የማእድን ሚኒስትሩ ሃሺም አሊ ሳሊም የካቢኔ ጉዳዮች ሚኒስትር ሆነዋል።

በፕሬዚዳንት አልበሽር የተሾሙት ሚኒስትሮቹ የረመዳን ወር ከመግባቱ በፊት በዛሬው እለት ቃለ መሃላ እንደሚፈፅሙም ይጠበቃል።

ፕሬዚዳንት አልበሽር በተጨማሪም ሞሃሙድ አባድ ሳሞህ የሰሜን ዳርፉር ክልል፣ ሁሴን ያሲን አቡሲርዋልን የምእራብ ዳርፉር ክልል እንዲሁም ሞሃመድ አህመድ ጋድኤልሲድን ደግሞ የማእከላዊ ዳርፉር ክልል አስተዳዳሪ አድርገው ሾመዋል።

እንዲሁም ካሊድ ሁሴን ሞሃመድ የብሉ ናይል ክልል አስተዳዳሪ ሆነው ሲሾሙ ጄነራል አህመድ ኢንራሂም ሞፋዳል የደቡብ ኮርዶፋን ክልል አስተዳዳሪ ተደርገው ተሹመዋል።

ፕሬዚዳንት አልበሽር ያካሄዱት የካቢኔ ሹም ሽር የሀገሪቱ ተቀዳሚ ምክትል ፕሬዚዳንትና ጠቅላይ ሚኒስትር የሆኑትን በክሪ ሀሰን ሳሌህን ይነካል ተብሎ የነበረ ቢሆንም ባሉበት ቦታ እንዲቀጥሉ ተደርጓል።

አዲስ የተሾሙት ሚኒስትሮች እና የክልል አስተዳዳሪዎች እንደ አውሮፓውያኑ አቆጣጠር በ2020 እስከሚካሄደው ፕሬዚዳንታዊ ምርጫ ድረስ በሃላፊነት የሚቆዩ ይሆናል ተብሏል።

ፕሬዚዳንት ኦማር ሀሰን አልበሽርም እንደ አውሮፓውያኑ አቆጣጠር በ2020 በሚካሄደው ምርጫ ላይ ይወዳደራሉ ተብሎ ነው የሚጠበቀው።

ምንጭ፦ www.sudantribune.com

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram