የሚኒስቴር መስሪያ ቤቶች አመታዊ እቅድ አፈጻጸም ከመጭው ሰኔ ወር ጀምሮ በጠቅላይ ሚኒስትሩ ግምገማ ይደረግበታል

የሚኒስቴር መስሪያ ቤቶች አመታዊ እቅድ አፈጻጸም ከመጭው ሰኔ ወር ጀምሮ ምክር ቤት ቀርበው በጠቅላይ ሚኒስትሩ ግምገማ ሊደረግባቸው ነው።

የተገልጋይን እርካታ የስኬት መለኪያቸው አድርገው ሃላፊነታቸውን የሚወጡ የመንግስት የአገልግሎት መስጫ ተቋማት የመኖራቸውን ያህል፥ ከአገልግሎት አሰጣጥ አኳያ ቅሬታ የሚነሳባቸውም የዚያኑ ያህል ናቸው።

ባለሙያዎች ደግሞ ሁለቱም አይነት ተቋማት በየጊዜው አሰራራቸውን ቢፈትሹና አፈጻጸማቸውን ቢገመግሙ የህብረተሰቡን እርካታ ማረጋገጥ እንደሚቻል ይገልጻሉ።
መንግስት በበኩሉ ባለፉት ሶስትና አራት አመታት የነበረው የእቅድ አፈጻጸም በህብረተሰቡ ዘንድ የመልካም አስተዳደር ችግርና የቅሬታ ምንጭ ሆኖ በመገኘቱ ሳቢያ፥ የተቋማት አፈጻጸም በየጊዜው ሊፈተሽ እንደሚገባ አቅጣጫ አስቀምጧል።

ይህ አቅጣጫም በሚኒስትሮች ምክር ቤት የጸደቀውን ሃገራዊ የእድገትና ትራንስፎርሜሽን እቅድ አፈጻጸም የክትትልና ግምገማ መመሪያን መሰረት በማድረግ የሚፈተሽ መሆኑን የብሄራዊ ፕላን ኮሚሸን ሃላፊ ሚኒስትር ዶክተር ይናገር ደሴ ይናገራሉ።

የአፈጻጸም የክትትልና ግምገማ መመሪያው በዋናነት ሀገሪቱ በ2017 ዓ.ም ያስቀመጠችውን ራዕይ ማሳካት፣ የህዝቡን ፍላጎት ማርካት እና የልማት እቅዶች ተፈጻሚ እንዲሆኑ በተጨማሪም ግልጽነትና ተጠያቂነትን በየደረጃው ማረጋገጥ የሚያስችል ነው።

በዚህ መሰረት ወጥነት ያላቸው የእቅድ አፈጻጸም ክትትልና ግምገማ መስፈርት እንዲሁም የመመዘኛ ዘዴዎች መዘርጋታቸውን ነው የሚናገሩት።

ሚኒስቴር መስሪያ ቤቶቹም በዋና ዋና 10 መሰረታዊ ለውጥ የሚያመጡ የአፈጻጸም ነጥቦች ላይ ትኩረት በማድረግ ይገመገማሉ።

በዚህ መልኩ የሚከናወነው የተቋማቱ ፍተሻም ከፊታችን ሰኔ ወር ጀምሮ በ10 ሚኒስቴር መስሪያ ቤቶች የስራ አፈጻጸም ግምገማ ይጀመራል ብለዋል።

ግምገማው ተቋማቱ ክፍተታቸውን እንዲደፍኑና በተደጋጋሚ የአፈጻጸም ከፍተት የሚታየባቸውን ተቋማት ደግሞ ተጠያቂ ለማድረግ ታስቦ የተዘጋጀ ነው ተብሏል።

በታሪክ አዱኛ – ኤፍ ቢ ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram