የልማት ባንክ ፕሬዚዳንት የመልቀቂያ ጥያቄ አቀረቡ

ዳዊት ታዬ – ሪፖርተር

የኢትዮጵያ ልማት ባንክን ላለፉት 20 ወራት በፕሬዚዳንትነት ሲመሩ የቆዩት አቶ ጌታሁን ናና፣ ከኃላፊነታቸውን ለመልቀቅ ጥያቄ አቀረቡ፡፡

የሪፖርተር ምንጮች እንደገለጹት፣ አቶ ጌታሁን ናና ኃላፊነታቸውን የለቀቁት በፈቃዳቸው ነው፡፡ ሆኖም ባንኩን ለመምራት በተመደቡ በአጭር ጊዜ ከኃላፊነታቸው ለመልቀቅ የተገደዱት፣ በባንኩ የዳይሬክተሮች ቦርድ ከፍተኛ ጭቀጭቅ ያስነሳ ስብሰባ ከተካሄደ በኋላ መሆኑን ለማወቅ ተችሏል፡፡

እንደ ምንጮች ገለጻ አቶ ጌታቸው የመልቀቅ ጥያቄያቸውን ለጠቅላይ ሚኒስትር ጽሕፈት ቤት ከማስገባታቸው ቀደም ብሎ፣ ከቦርዱ ጋር በተለያዩ ጉዳዮች ያለመግባባት ተፈጥሮ ነበር፡፡

አቶ ጌታሁን የተሾሙት በቀድሞው ጠቅላይ ሚኒስትር ኃይለ ማርያም ደሳለኝ ነው፡፡ እሳቸው የተኳቸው የቀድሞ ፕሬዚዳንት አቶ ኢሳያስ ባህረ ነበሩ፡፡

አቶ ጌታሁን የኢትዮጵያ ልማት ባንክን በፕሬዚዳንትነት እንዲመሩ ከመሰየማቸው በፊት፣ የኢትዮጵያ ብሔራዊ ባንክ ምክትል ገዥ በመሆን ከሰባት ዓመታት በላይ አገልግለዋል፡፡ በኢትዮጵያ ብሔራዊ ባንክ ውስጥ ከ20 ዓመታት በላይ ሠርተዋል፡፡

በብሔራዊ ባንክ ሱፐርቪዥን ሥራ ላይ የቆዩት አቶ ጌታሁን፣ የኢትዮጵያ ልማት ባንክን ለመምራት መመደባቸው በወቅቱ ብዥታ መፍጠሩ አይዘነጋም፡፡ ምክንያቱ ደግሞ ተቆጣጣሪ መሥሪያ ቤት ውስጥ አመራር የሰጠ ሰው እንዴት የባንክ ሥራን ይመራል የሚል ነበር፡፡

አቶ ጌታሁን በኅዳር 2009 ዓ.ም. የልማት ባንክ ፕሬዚዳንት ሆነው ከመሰየማቸው በፊት፣ ባንኩን ከስምንት ዓመታት በላይ በፕሬዚዳንትነት ሲያገለግሉ የነበሩትን አቶ ኢሳያስ ባህረን የመንግሥት የፋይናንስ ተቋማት ተቆጣጣሪ ኤጀንሲ ዋና ዳይሬክተር ስንታየሁ ወልደ ሚካኤል (ዶ/ር) በደብዳቤ ነበር ያስነሱዋቸው፡፡

የአቶ ጌታሁን የመልቀቂያ ጥያቄ ተቀባይነት ያግኝ አያግኝ የተገለጸ ነገር የለም፡፡ አቶ ጌታሁን በኢትዮጵያ ልማት ባንክ ሲሰየሙ በባንክ ኢንዱስትሪ ውስጥ ከፍተኛ አስተዋጽኦ አበርክተዋል በማለት፣ በኢትዮጵያ ባንኮች ማኀበርና በኢትዮጵያ ብሔራዊ ባንክ መሸለማቸው አይዘነጋም፡፡

ለአገልግሎታቸው ዕውቅና ለመስጠት በተደረገ ሥነ ሥርዓት ላይ በኢንዱስትሪው ውስጥ ማንም ባለሙያ እንዲህ ባለ መንገድ ተሸኝቶ እንደማያውቅ ተገልጾ ነበር፡፡

አቶ ጌታሁን የኢትዮጵያ ልማት ባንክን ከተረከቡ ወዲህ በርካታ ጫናዎች እንደነበሩባቸው፣ ጫናዎቹም ከብድር አሰጣጥ ጋር በተገናኘ እንደሆነ ይነገራል፡፡ ልማት ባንክ በአሁኑ ጊዜ በአገሪቱ ከሚገኙ ባንኮች ከፍተኛ የተበላሸ ብድር መጠን አለው፡፡ ይህ የተበላሸ ብድር መጠን ባለፈው ዓመት 28 በመቶ መድረሱ መዘገቡ አይዘነጋም፡፡ በቅርቡ ደግሞ ወደ 20.5 በመቶ ዝቅ ማለቱ ይታወሳል፡፡

ባንኩ በአገሪቱ ውስጥ በመንግሥት ይዞታ ሥር ካሉ ሁለት ባንኮች አንዱ ሲሆን፣ የፖሊሲ ባንክ በመሆኑ በርካታ ጥያቄዎች የሚቀርቡበትና ከብድር አሰጣጥ ጋር በተያያዘ ትችቶች ሲቀርቡበት ቆይቷል፡፡

ልማት ባንክን ባለፉት 27 ዓመታት አቶ ፀጋዬ አስፋው፣ አቶ ገብረ ማርያም በየነ፣ አቶ ሞገስ ጨመረ፣ አቶ ወንድወሰን ኢተፋና አቶ ኢሳያስ ባህረ በፕሬዚዳንት መምራታቸው አይዘነጋም፡፡

Share your thoughts on this post