የሁለተኛ የዕድገትና ትራንስፎርሜሽን ግብ ለማሳካት አስፈጻሚ ተቋማት ዕቅዳቸውን ሊከልሱ ይገባል – የብሄራዊ ፕላን ኮሚሽን

የሁለተኛ የዕድገት እና ትራንስፎርሜሽን ዕቅድ የተቀመጡ ግቦችን በቀሪዎቹ ዓመታት ለማሻሻል አስፈጻሚ ተቋማት ከወዲሁ ዕቅዳቸውን ሊከልሱ እንደሚገባ የብሄራዊ ፕላን ኮሚሽን አስታወቀ።

ኮሚሽኑ ከዚህ ቀደም ከግንቦት 14 እስከ 17 ድረስ በሃገሪቱ በሚገኙ 12 ዋና ዋና ከተሞች የምክክር መድረክ ማካሄዱን ገልጿል፡፡

በዛሬው ዕለትም ሚኒስትሮች፣ የሚኒስትር ዴኤታዎችና ከተለያዩ የሴክተር መስሪያ ቤት አስፈጻሚዎች ጋር በዕቅዱ አፈጻጸምና በቀጣይ አቅጣጫዎች ዙሪያ ውይይት ተካሂዷል፡፡

በሚኒስትር ማዕረግ የኮሚሽኑ ኮሚሽነር አቶ ተካአየሁ ተካልኝም እስከአሁን የባከነውን ጊዜ ለማማካካስም ከፍተኛ ስራ እንደሚጠበቅ አንስተው ይህንንም ለማሳካት አስፈጻሚ ተቋማትም ከማሻሻያው ጋር እንዲያዋህዱ አሳስበዋል፡፡

ኮሚሽነሩ ከዚህ ቀደም የመንግስት ፕሮጀክቶች መጓተት ብዙ ዋጋ ማስከፈሉን ጠቅሰው ከእንግዲህ እያንዳንዱ ፕሮጀክት ፋይዳውና ፋይናንሱ ሳይጠና ወደ ተግባር አይገባም ያሉ ሲሆን ይህንንም ለመከላከል መመሪያ መውጣቱንም ነው የገለጹት፡፡

እንዲሁም እቅድ አወጣጡ ከዚህ ቀደም ውይይት ሳይደረግበት በተወሰኑ አስፈጻሚዎች አማካኝነት ብቻ ነበር ወደ ስራ የሚገባው ከአሁን በኃላ ከታች ወደ ላይ እንዲሆን እንሰራለን ብለዋል፡፡

በሁለተኛ የዕድገትና ትራንስፎርሜሽን የመካከለኛ ዘመን በማክሮ ኢኮኖሚ የተሻለ አፈጻጸም የታየ ሲሆን በኢንዱስትሪ፣ በማምረቻና በግብርና ዝቅተኛ አፈጻጸም መታየቱን ኮሚሽነሩ ገልጸዋል፡፡

በዘንድሮው በጀት ዓመት በጨርቃ ጨርቅ ዘርፍ አፈጻጸሙ 10 ነጠብ 7 በመቶ ሲሆን በቆዳና ቆዳ ውጤቶች ዘርፍ አፈጻጸም ደግሞ 16 ነጥብ 3 በመቶ ኆነዋል፡፡

በዚህም የማምረቻ ኢንዱስትሪው አፈጻጸም ቀይ መብራት ያሳየ ሲሆን ጥቅል አፈጻጸሙም ከ50 በመቶ በታች ነው ተብሏል፡፡

ጠቅላላ የሀገር ውስጥ ምርት ዕድገቱ ደግሞ በአማካይ 9 ነጥብ 5 በመቶ ሲሆን ይህም ከዕቅዱ አንጻር 87 ነጥብ 5 በመቶ መሆኑ ተገልጿል፡፡

በ2009 የነፍስ ወከፍ ገቢን 1176 ነጥብ 8 የአሜሪካ ዶላር ለማድረስ ታቅዶ ማድረስ የተቻለው 828 ነጥብ 5 ዶላር ሲሆን ይህም ከዕቅዱ አንጻር 74 በመቶ ነው ተብሏል፡

በግብርና ምርቶች ደግሞ ለውጭ ገበያ የቀረበው የቡና መጠን በአማካይ የዕቅዱን 43 በመቶ ብቻ ማሳካቱንም አስታውቀዋል፡፡

በጥቅሉ የውጭ ንግዱ መቀዛቀዝ፣ የዓለም ገበያ የሸቀጦች ዋጋ መለዋወጥ፣ የግብርናና የኢንዱስትሪ ምርቶች ምርታማናት ማነስ፣ በመንግስት ልዩ ድጋፍ የሚደረግላቸው ባለሃብቶችም ምን ያህል ምርት ለውጭ ገበያ አቅርበዋል የሚል ቁጥጥር ያለመደረጉ፣ የውጭ ምንዛሬ እጥረት እና የሀገሪቱ የዕዳ ጫና ከፍተኛ መሆኑ የሁለተኛ የዕድገትና ትራንስፎርሜሽን አፈጻጸም ዝቅተኛ ለመሆኑ በምክንያትነት ተነስተዋል፡፡

ቀሪዎቹን ሁለት ዓመታት የታዩትን ክፍተቶች በመሙላት አፈጻጸሙን ለማሻሻልም ኮሚሽኑ ከአስፈጻሚ አካላት ጋር እየመከረ እንደሚገኝ ተገልጿል፡፡

 

 

በፋሲካው ታደሰ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram