ዝናብ ያልበግራት የትራፊክ ፖሊስ የማዕረግ ዕድገት አገኘች

በዛምቢያ ዋና ከተማ ሉሳካ ከፍተኛ ዝናብ እየጣለ ባለበት ሰዓት አንዲት የትራፊክ ፖሊስ የሚወርደውን ዶፍ ከቁብ ሳትቆጥር ቃል ኪዳን የገባችለትን የትራፊክ ስራዋን በመከወኗ የሚገባትን የማዕረግ ዕድገት አግኝታለች፡፡

የትራፊክ ፖሊሷን ድርጊት በአድናቆት ያስተዋሉት አሽከርካሪዎች ፎቶ በማንሳት ማህበራዊ ድረ ገጽ ላይ በመለጠፋቸው ስራዋን ከራሷ ደህንነት ያስበለጠች ታታሪ መሆኗን ብዙዎች መስክረውላታል፡፡

ከዚህ ቀን ጀምሮም ትራፊኳን ‹‹በዚሁ ቀጥይ፤በርቺ›› የሚሏት ሰዎች የበዙ ሲሆን በማህበራዊ ድረ ገጾችም አነጋጋሪነቷ ቀጥሏል፡፡
ጥቂት የማይባሉ የዛምቢያ የትራፊክ ፖሊስ አባላት የተሠማሩበትን አገልግሎት በአግባቡ ከማከናወን ይልቅ በሙስና እየተዘፈቁ ባሉበት ባሁኑ ወቅት እንደዚች ዓይነት የትራፊክ ፖሊስ መገኘቷ ብርቅ ነው ያለው የሀገሪቱ ፖሊስ ጽህፈት ቤት ለሌሎች ፖሊሶች መልካም አርአያ ይሆናል ያለውን ተግባሯን በማወደስ የማዕረግ ዕድገት አጎናጽፏታል፡፡

የትራፊክ ፖሊሷን ተግባር ያስተዋለ አንድ ግለሰብ በፌስ ቡክ ገጹ ላይ “የተመደበበትን ሥራ ከበቂ በላይ በታታሪነት የሚያከናውን ሰው ሽልማት የሚያስፈልገው ቢሆንም የፖሊሷ ስራ ከሽልማት በላይ ነው፡፡በሙስና ለሚታሙት የሀገሪቱ የትራፊክ ፖሊሶችም ማለፊያ መልዕክት ያስተላልፋል ›› ማለቱን ቢቢሲ ዘግቧል፡፡

 

Share your thoughts on this post