ወጣት ሜላት ላይ የአሲድ መድፋ ጥቃት ተፈፀመባት

አሳዛኙ ዜና ይኸው ነው። ሜላት ተሰማ በምትባል ወጣት ላይ የአሲድ መድፋ ጥቃት ተፈፀመባት። ወላጆቿ የድረሱልን ጥሪ እያሰሙ ነው።
….
የፍትህ ያለህ!
ለኢትዮጵያ መንግሥትና ሕዝብ የቀረበ የእርዳታ ጥሪ!

እኔ አቶ ተሰማ ብርሃንና ባለቤቴ ወ/ሮ መሰረት ኪዳኔ በልጃችን ሜላት ተሰማ ላይ ሚያዚያ 13/2010 ዓ.ም. የደረሰባትን ዘግናኝ ጥቃት የኢትዮጵያ መንግሥትና ሕዝብ እንዲያውቅልን እንፈልጋለን።

የዕለት ጉርሳችን ለማግኘት ተሯሩጠን እየሰራን ከአምስት ልጆቻችን ጋር ያሳደግናት ልጃችን ሜላት ሚያዚያ 13 አመሻሽ ላይ ከባለቤቷ ጋር ተዝናንታ ስትመለስ በግምት ከምሽቱ አራት ሰዓት ቤቷ አካባቢ ልትደርስ ስትል እስካሁን ማንነቱ ባልታወቀ ግለሰብ አሲድ በመላ ሰውነቷ ላይ ተደፍቶባታል፡፡ ጉዳዩን ፖሊስ እያጣራው ነው፡፡ አንድ ማንነቱን የማታውቀው ግለሰብ ቀደም ሲል በስልክ እየደወለ “ባንቺ ምክንያት ሕይወቴ ተበላሽቷል ሳላጠፋሽ አላርፍም!” እያለ ያስፈራራት ስለነበር ምርመራ እየተደረገበት ነው።

ጨለማን ተገን አድርጎ ጥቃቱን በፈጸመበት ሰዓት ስቃዩን መቋቋም ያልቻለቺው ሜላት በደመነፍስ ወደ ቤቷ ነበር የገባቺው። ጉዳት ከደረሰባት ከአንድ ሰዓት በኋላ ማለትም ከምሽቱ 5:00 ሰዓት ባለቤቷ ወደ የካቲት ሆ�ስፒታል የወሰዳት ሲሆን ይህን ጆሮ የሚያጮህ ጥቃት ከለሊቱ 7:30 ደውሎ ነበር የነገረን። ልጃችን አሁንም ድረስ ሕክምናዋን እየተከታተለች ያለቺው የካቲት ሆስፒታል የቃጠሎና መሰል ተጎጂዎች ሕክምና ክፍል ውስጥ ነው።

ፖሊስ ወንጀሉን የፈጸመውን አካል ለመያዝ ክትትል እያደረገ ይገኛል። ወገኖቻችን! መቼም በእንዲህ ያለ ክፉ ጊዜ ቀርቶ በደህናው ጊዜም ቢሆን የወላጅን ጭንቀት የማይረዳው የለም። በልጃችን ላይ ዘግናኝ ድርጊት የፈጸመው ተጠርጣሪ አለመያዙ ሳያንስ ልጃችን በማታውቀው ነገር በከፍተኛ ሁኔታ በመሰቃዬት ላይ ትገኛለች።

የየካቲት ሆስፒታል የሕክምና ባለሙያዎች ተደጋጋሚ ቀዶ ጥገና ያደረጉላት ሲሆን በየቀኑ ቆዳዋን እያጠቡ ስቃይዋን የሚቀንስ ቅባት እየቀቡላት ይገኛሉ። ሆኖም የተደፋባት አሲድ መላ ሰውነቷን በማዳረሱና ቆዳዋ ውስጥ ሰርጾ በመግባቱ ሜላት ስቃይዋን መቋቋም አልቻለችም።

ስለዚህም ለተሻለ ሕክምና ለወገን ደራሽ ወገን ነውና አቅማችሁ በቻለው ሁሉ ከጎናችን እንድትሆኑ በእግዚአብሔር ስም እንጠይቃለን። በአካል መጥታችሁ ሜላትን መጠየቅና መርዳት የምትፈልጉ በእነዚህ ስልኮች ታገኙናላችሁ፦

0911 30 50 67 ተሰማ ብርሃን (አባት)
0910 02 87 92 አይጠገብ ብርሃን (አጎት)
0911 60 51 02 ነጋ አያና (በጎ ፈቃደኛ)

የኢትዮጵያ ንግድ ባንክ ሒሳብ ቁጥር
1000161550357
ተሰማ ብርሃን

News.et

Share your thoughts on this post