ኮሚሽኑ ህብረተሰቡና የፀጥታ ሃይሉ የፕሬዚዳንት ኢሳያስ ጉብኝት በሰላም እንዲጠናቀቅ ላደረጉት አስተዋጽኦ ምስጋና አቀረበ

የፌደራል ፖሊስ ኮሚሽን የኤርትራው ፕሬዚዳንት ኢሳያስ አፈወርቂ ጉብኝት በሰላም እንዲጠናቀቅ ህብረተሰቡና የፀጥታ ሃይሉ ላደረገው አስተዋጽኦ ምስጋናውን አቀረበ።

የፌደራል ፖሊስ ኮሚሽን ኮሚሽነር ጀኔራል ዘይኑ ጀማል፥ እያንዳንዱ ኢትዮጵያዊ የፕሬዚዳንቱ ጉብኝት በሰላም እንዲጠናቀቅ የሚጠበቅበትን መወጣቱን ተናግረዋል።

በተለይም የአዲስ አበባ፣ የሃሳዋና ሻሸመኔ አካባቢ ወጣቶች ለሰላሙ ዘብ በመሆን ምንም አይነት የፀጥታ ችግር እንዳይፈጠር ያደረጉት አስተዋጽኦ የሚያኮራ ነው ብለዋል።

የሃገር መከላከያ ሰራዊትን ጨምሮ የፌደራል ፖሊስና ሌሎች የፀጥታ መዋቅር አካላትም፥ በቅንጅት የሰሩት ስራ የፕሬዚዳንቱ ጉብኝት በሰላም ለመጠናቀቁ መሰረት መሆኑንም ነው የተናገሩት።

አሁን የታየውን የፀጥታ ሃይሉና የህብረተሰቡ በጋራ ሰላም የማስጠበቅ ሂደት አጠናክሮ በማስቀጠል የኢትዮጵያን ዘላቂ ሰላም ማረጋገጥ ይገባልም ብለዋል።

የኤርትራው ፕሬዚዳንት ኢሳያስ አፈወርቂ በኢትዮጵያ ያደረጉትን የሶስት ቀናት ይፋዊ ጉብኝት አጠናቀው ዛሬ ወደ ሃገራቸው መመለሳቸው ይታወሳል።

 

በዓላዛር ታደለ – ኤፍ ቢ ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram