ክረምቱን ተከትሎ ለሚከሰት የጎርፍ አደጋ 450 ሺህ ሜትሪክ ቶን የምግብ ክምችት ተዘጋጅቷል- የብሄራዊ አደጋ ስጋት አመራር ኮሚሽን

በሀገሪቱ ክረምቱን ተከትሎ ሊደርሱ ለሚችሉ የጎርፍ አደጋዎች የሚውል የ450 ሺህ ሜትሪክ ቶን የምግብ ክምችት እና የሰው ሃይል መዘጋጀቱን የብሄራዊ አደጋ ስጋት አመራር ኮሚሽን አስታወቀ።

ባለፈው አመት በአፋር እና በሱማሌ ክልል የአዋሽ ወንዝ መሙላቱን ተከትሎ እንዲሁም በምስራቅ ሸዋ ዞን፣በደቡብ ክልል በአዋሳና ቡታጅራ ከተማና በሌሎችም አካባቢዎች የደረሰው የጎርፍ አደጋ የበርካቶቸን ህይወት አደጋ ላይ መጣሉ እና ንብረት ላይ ጉዳት ማድረሱ ይታወሳል።

በአሁኑ ወቅትም በእነዚህ አካባቢዎች ከባለፈው አመት ጋር ተመሳሳይ የሆነ አደጋ ሊከሰት ይችላል የሚል ስጋት እንዳለ ተነግሯል።

ከእነዚህ አካበቢዎቸ ባለፈ በየአመቱ ጎርፍ በሚከሰትባቸው አካባቢዎች የሚኖሩ ነዋሪዎችም ተመሳሳይ ስጋት እንዳለባቸው ተጠቁሟል።

ባለፈው ዓመት ከፍተኛ የጎርፍ አደጋ የደረሰባቸው የምስራቅ ሸዋ ዞን አምስት ወረዳዎች ተጠቃሾች ናቸው።

እነዚህ ወረዳዎች ካላቸው ተፈጥሯዊ አቀማመጥ ጋር ተያይዞ አሁንም የጎርፍ ስጋት እንደሚታይባቸው ከአዋሽ ተፋሰስ ባለስልጣን የተገኘው መረጃ ያመላክታል።

በዘንድሮ ዓመት የብሄራዊ አደጋ ስጋት ስራ አመራረ ኮሚሽን ባደረገው ጥናት በክረምት ወቅት በእነዚህ አካባቢዎች ላይ የጎርፍ አደጋ ሊከሰት እንደሚችል አስታውቋል።

በኮሚሽኑ ጥናት በኢትዮ ሱማሌ፣ በደቡብ እና ኦሮሚያ ክልሎች የተወሰኑ አካባቢዎች የጎርፍ አዳጋ ሊከሰት እንደሚችል ተለይቷል።

ስጋት ባለባቸው ቦታዎች ላይ አስቀድሞ መከላከል ላይ ያተኮረ ስራ ከዞኑ እና ክልሎች ጋር እየተሰራ እንደሚገኝ ኮሚሽኑ አስታውቋል።

የኮሚሽኑ የአደጋ ምላሽ ክትትልና መልሶ ማቋቋም ዳይሬክተር ከፍተኛ ባለሙያ አቶ አብርሃም አበበ ፤ በአሁን ወቅት በተለያዩ አካባቢዎች ለሚከሰት የጎርፍ አደጋ ምላሽ ለመስጠት የሚያሰችል ዝግጅት መድረጉን ተናግረዋል።

በዚህም መሰረት በሀገሪቱ ክረምቱን ተከትሎ ሊከሰቱ ለሚችሉ የጎርፍ አደጋዎች የሚውል የ450 ሺህ ሜትሪክ ቶን ተጠባባቂ የምግብ ክምችት እና በሰው ሃይል እንደተዘጋጀ ነው የተነገረው።

በቀጣይም የአደጋው ስፋት ሊጨምር ስለሚችል በተደራጀ መንገድ ለመቋቋም 1 ነጥብ 5 ሚሊየን ሜትሪክ ቶን ምግብ በመጠባበቂያ መጋዘን ላይ ለማኖር እየተሰራ ነው ተብሏል።

ምላሽ ለመስጠት ከመዘጋጀት በተጨማሪ ክረምቱን ተከትሎ ለሚከሰት ጎርፉ አቅጣጫ የማስቀየር፣ መፋሰሻ የመስራትና መሰል የመከላከያ ስራዎች እንደተጀመሩ ታውቋል።

ይህም በሰውና በንብረት ላይ የሚደርሰውን የጎርፍ አደጋ መከላከል የሚያሰችል ቢሆንም ከአጭር ጊዜ መፍትሄ በተጨማሪ የረጅም ጊዜ መፍትሄ እንደሚያስፈልግ ተነግሯል።

በታሪክ አዱኛ – ኤፍ.ቢ.ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram