ከሳዑዲ አረቢያ ከእስር ከተለቀቁት ኢትዮጵያዊያን መካከል 690 ያህሉ አዲስ አበባ ገቡ

እስረኞቹ በአለም አቀፉ የፍልሰት ድርጅት አስተባባሪነት ዛሬ ግንቦት 11፣2010 ምሽት በቦሌ አለም አቀፍ አውሮፕላን ማረፊያ ሲደርሱ ቤተሰብና ወዳጅ ዘመድ እንዲሁም የመንግስት የስራ ኃላፊዎች በተገኙበት አቀባበል ተደርጎላቸዋል፡፡

በዲፕሎማሲያዊ ጥረት ከእስር ተለቀው አዲስ አበባ ከገቡ ኢትዮጵያዊያን መካከል አስተያየታቸውን ለኢቲቪ የሰጡ መንግስት ከጨለማ ውስጥ ስላወጣቸው ምስጋናቸውን አቅርበዋል፡፡

ጠቅላይ ሚንስትር አብይ አህመድ በሳኡዲ አረቢያ ከትላንት ወዲያ የስራ ጉብኝት ባደረጉበት ወቅት ነበር እስረኞቹ እንዲፈቱ ከአገሪቱ መንግስት ጋር ከስምምነት የተደረሰው፡፡

ጠቅላይ ሚንስትሩ ዛሬ በሚሊኒየም አዳራሽ በተካሄደ የአስተሳሰብ መገንቢያና ማነቃቂያ መድረክ ላይ ለሳኡዲ ከቀረቡ 10 ጥያቄዎች 9ኝ ያህሉ ኢትዮጵያዊያን እስረኞች መፈታትን ጨምሮ ለሙሉ ለሙሉ ተቀባይነት አግኝተዋል ብለዋል፡፡

በእስር ላይ የሚገኙት የሼህ ሙሀመድ ሁሴን አላሙዲ ጉዳይም በቅርቡ ከእስር እንደሚለቀቁ ከመግባባት ተደርሷል ብለዋል፡፡
ከእስር እንዲፈቱ ከስምምነት ከተደረሰው ኢትዮጵያዊያም ውስጥ 310 ያህሉ በቀጣይ ወደ አገራቸው ይገባሉ ተብሎ ይጠበቃል፡፡

Share your thoughts on this post