ኦስትሪያ ሰባት መስጊዶችን ልትዘጋ መሆኑን አስታወቀች

ኦስትሪያ በውጭ ሃገራት የሚደጎሙ ሰባት መስጊዶችን ልትዘጋ መሆኑን አስታወቀች።

የኦስትሪያ መራሄ መንግስት ሰባስቲያን ከርዝ በተለያዩ ሃገራት ይደጎማሉ የተባሉ ሰባት መስጊዶች እንደሚዘጉ ተናግረዋል።

የአሁኑ የመንግስት አቋም መስጊዶቹ ከእምነት አገልግሎት ይልቅ ፖለቲካዊ ተልዕኮን ያነገቡ ናቸው በሚል የተወሰነ መሆኑም ተገልጿል።

አንዳንዶቹ መስጊዶች ከቱርክ ብሄርተኝነት አቀንቃኞች ጋር ግንኙነት እንዳላቸው ተደርሶበታልም ነው የተባለው።

ከዚህ ጋር ተያይዞም ባለፈው ሚያዚያ ወር ላይ የቱርክ ጦርን ወታደራዊ ልብስ የለበሱ ህጻናት፥ በአንደኛው የአለም ጦርነት ወቅት የተካሄደውን የጋሊፖሊ ጦርነትን የሚያሳይ ትዕይንት ሲያካሂዱ ነበር ተብሏል።

የህጻናቱ ትዕይንት በዋና ከተማዋ ቪየና ፅንፈኛ የቱርክ ብሄርተኛ አቀንቃኝ ነው በሚባለውና ራሱን ግራጫ ተኩላዎች በሚል የሚጠራው ቡድን አማካኝነት እንደተዘጋጀ መረጃው አለኝ ብሏል የሃገሪቱ መንግስት።

ከዚህ ጋር ተያይዞም የዓረብ ሃይማኖተኞች ማህበረሰብ የሚል መጠሪያ ያለውን ድርጅት እንዲዘጋ መወሰኑንም ገልጿል።

በተጨማሪም በድርጅቱ የሚመሩና በቪየና፣ በሃገሪቱ ሰሜናዊ ክፍል እና ካሪንሺያ አካባቢ የሚገኙ መስጊዶች እንዲዘጉ ተወስኖባቸዋል።

የሃገሪቱ መንግስትም ከዚህ ጋር ተያይዞ ግንኙነት አላቻው ያላቸውን ሌሎች መስጊዶችና ኢማሞች ለመለየት ከሙስሊም ማህበረሰብ ጋር እየሰራሁ ነው ብሏል።

ከመስጊዶቹ በተጨማሪም ከጉዳዩ ጋር ግንኙነት አላቸው የተባሉ የሃይማኖት መሪዎች ከኦስትሪያ ይባረራሉም ነው የተባለው።

በሃገሪቱ ከሚገኙ 260 ኢማሞች መካከል 60 ያህሉ ምርመራ እየተደረገባቸው መሆኑንም የሃገሪቱ መንግስት አስታውቋል።

ከዚህ ውስጥ 40 ያህሉ ደግሞ ከቱርክ መንግስት ጋር ግንኙነት አለው የሚባለው እስላማዊ ቡድን አባላት መሆናቸውም ነው የተነገረው።

መራሄ መንግስት ከርዝ በኦስትሪያ ራሱን ነጥሎ የሚንቀሳቀስ ቡድን፣ እስላማዊ መንግስትን ማቋቋም እና የፅንፈኝነት አዝማሚያዎች ተቀባይነት የላቸውም ብለዋል።

የአሁኑ እርምጃም ይህን ለመከላከል ያለመና ማንኛውም ሃይማኖታዊ ተቋም ከፖለቲካ ጋር ግንኙነት እንዳይኖረው ለማድረ የታሰበ መሆኑም ገልጸዋል።

በኦስትሪያ በአብዛኛው ዘራቸው ከቱርክ የሚመዘዝ ወደ 600 ሺህ የሚጠጉ ሙስሊሞች እንደሚገኙ ይታመናል።

የአሁኑ ውሳኔም በበርካታ ኦስትሪያውያን ሙስሊሞች ዘንድ ከፍተኛ ተቃውሞ ገጥሞታል።

የሃገሪቱ ፕሬዚዳንት ጽህፈት ቤት ቃል አቀባይ ኢብራሂም ካሊን፥ ውሳኔን ዘረኝነትና ሙስሊም ጠል አካሄድ ብለውታል።

አካሄዱንም የማይረባ ፖለቲካዊ ትርፍ ለማግኘት የታሰበ በማለት ኮንነውታል።

 

ምንጭ፦ ቢቢሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram