ኢትዮጵያና ኤርትራ የሰላምና ወዳጅነት ስምምነት መፈራረማቸው ለዜጎቻቸው ብልፅግና ወሳኝ መሆኑን አሜሪካ ገለፀች

ኢትዮጵያና ኤርትራ በመካከላቸው ያለውን ልዩነት ለመፍታት የደረሱት ስምምነት ለ20 ዓመታት ለነበረው ፍጥጫ ፍፃሜ የሰጠ መሆኑን የአሜሪካ የውጭ ጉዳይ ሚኒስትር ማይክ ፓምፒዮ አስታወቁ።

በጠቅላይ ሚኒስትር ዶክተር አብይ አህመድና በፕሬዚዳንት ኢሳያስ አፈወርቂ የፈረሙት ስምምነት ሀገራቱ ዜጎቿቸውን ወደ ብልፅግና፣ ሰላም እና ፖለቲካዊ ለውጦች ለመምራት የሚያስችል እንደሆነም ነው የውጭ ጉዳይ ሚኒስትሩ የገለፁት።

ሀገራቱ ግንኙነታቸውን ለማሻሻል የደረሱት ስምምነት ዜጎቻቸው በሚጋሯቸው የኢኮኖሚ፣ ፓለቲካ እና ማህበራዊ ትብብሮች ላይ ትኩረት እንዲያደርጉ እድል የሚፈጥር ነው ብለዋል።

አሜሪካም በሀገራቱ መካከል የተደረሰውን የሰላም ስምምነት እንደምትደግፍና ይህም በግልፀኝነትና በመተማመን እንዲቀጥል እንደምታበረታታ አስታውቀዋል።

በኢትዮጵያና በኤርትራ መካከል የተደረሰው ስምምነት ለአፍሪቃ ቀንድና ቀይ ባህር መረጋጋት፣ ደህንነት እና ልማት ለማምጣትም አስተዋዕኦ እንዳለው ጠቁመዋል።

የሩሲያ መንግስትም በኢትዮጵያና ኤርትራ መካከል የተደረሰው ስምምነት እንደምታደንቅ ገልጿል።

በሀገራቱ መካከል የተደረሰው ስምምነት ዜጎች በአኮኖሚ፣ ፓለቲካዊ እና ማህበራዊ ዘርፎች ተጠቀሚ እንዲሆኑ የሚያስችል መሆኑንም አስታውቋል።

ስምምነቱ ቀጠናው የተረጋጋት እና ደህንነቱ የተረጋገጠ እንዲሆን እና በአፍሪካ አህጉር ፖለቲካ ላይ በጎ አስተዋፅኦ በማሳረፍ አካባቢያዊ የኢኮኖሚ ውህደት እንዲፈጠር የሚያስችል መሆኑን የሩሲያ መንግስት ገልጿል።

Share your thoughts on this post