አፕል ሰራተኛውን የኩባንያውን ሚስጥር ሰርቆ ወደ ቻይና ለመሸሽ ሞክሯል በሚል ከሰሰው

የአፕል የቀድሞ ሰራተኛ የኩባንያው ፈጠራ የሆነውን የሹፌር አልባ መኪና ምስጢር በመስረቅ እና ከዚያም ወደ ቻይና ለመሸሽ በመሞከር በሚል መከሰሱ ተነገረ፡፡

ኩባንያው ፍርድ ቤት ተገኝቶ እንዳስረዳው ከሆነ የአፕል ሹፌር አልባ መኪና ፕሮጀክት ውስጥ ተቀጥሮ በመስራት ላይ የነበረው ሻንግ የተባለው ግለሰብ በቻይና ለሚገኝ ተመሳሳይ ድርጅት ምስጢሩን አሳልፎ ለመስጠት አቅዶ እንደነበር ገልጿል፡፡

በዚህም ሐምሌ መጀመሪያ ላይ ወደ ቻይና ለማቅናት ሲዘጋጅ በሳንጆሴ ካሊፎርኒያ አየር ማረፊያ ውስጥ ተይዟል፡፡

የአሜሪካ ፌደራል ምርመራ ቢሮ (ኤፍቢአይ) ግለሰቡን የአንድ ኩባንያ የንግድ ሚስጢር በመስረቅ በሚል ከሶታል፡፡

በቻይና የሚገኘው ኩባንያ በአንጻሩ ከግለሰቡ የትኛውንም ዓይነት መረጃ ያለመቀበሉን ይፋ አድርጓል፡፡

ሻንግ በ2018 ወደ ቻይና ማቅናቱ የተገለጸ ሲሆን፥ ጉብኝቱን አጠናቆ ወደ አሜሪካ እንደተመለሰ ወደ ሀገሩ መዛወር እንደሚፈልግ ለአለቃው ማሳወቁ ተገልጿል፡፡

ይህንንም ተከትሎ ታዲያ ኩባንያው ባደረገበት ክትትል በርካታ መረጃዎችን ወደ ግል ኮምፕዩተሩ ማዛወሩንና መጫኑ ተነግሮዋል፡፡

ግለሰቡም ታዲያ አንዳንድ ተገቢ ያልሆኑ መረጃዎችን ወደ ባለቤቱ ኮምፒዩተር መገልበጡን አምኗል፡፡

ቻይናዊው ጥፋተኛ ሆኖ ከተገኘ የ10 ዓመት እስራትና የ250 ሺህ ዶላር ቅጣት ይጠብቀዋል ተብሏል፡፡

 

 

ምንጭ፦ቢቢሲ
በአብርሃም ፈቀደ

Share your thoughts on this post