ነጋዴዎች ቤታቸው ሆነው ንግድ ፍቃድ ማውጣትና ማሳደስ የሚችሉበት አሰራረ ሊዘረጋ ነው

ነጋዴዎች ቤታቸው ሆነው ንግድ ፍቃድ ማውጣትም ሆነ ማሳደስ የሚችሉበት አሰራረ ሊዘረጋ መሆኑ ተገለፀ።

አዲስ የንግድ ፍቃድና በጊዜ ገደብ ንግድ ፍቃድ የሚያድሱ ነጋዴዎች በየጊዜው ከሚያነሷቸው ቅሬታዎች መካከል የአገለግሎት አሰጣጡ መዘግየት ተጠቃሽ ነው።

የአገልግሎቱ አለመፋጠን ደግሞ ጊዜያቸውን በአግባቡ እንዳይጠቀሙ እንቅፋት እንደሚሆን ያነሳሉ።

ይህ ችግር በየጊዜው እንደሚከሰት በጥናት ያረጋገጠው የንግድ ሚኒስቴር ለችግሩ መፍትሄ የሚሆን ማሻሻያ በማድረግ ላይ ይገኛል።

የንግድ ሚኒስትሩ አቶ መላኩ አለበል ከፋና ብሮድካስቲግ ኮርፖሬት ጋር ባደረጉት ቆይታ፥ በማሻሻያው ነጋዴዎች ቤታቸው ሆነው ንግድ ፍቃዳቸውን ማውጣትና ማሳደስ የሚችሉበት አሰራረ ለመዘርጋት ዝግጅት እየተደረገ መሆኑን ይናገራሉ።

ይህ በቴክኖሎጂ የተደገፈ አሰራር መዘርጋቱ በአዲስ የንግድ ፍቃድም ሆነ በእድሳት ወቅት የንግዱ ማህበረሰብ የሚያጋጥመውን መጉላላትን ያስቀራል ብለዋል ሚኒስትሩ።

ቴክኖሎጂው ወጪ እና ጊዜን የሚቆጥብ መሆኑንም ሚኒስትሩ አቶ መላኩ አለበል ጠቁመዋል።

በቴክኖሎጂው ወደ ስራ ከመግባቱ በፊት ሙከራ ይደረግበታል ያሉት አቶ አለበል፥ ሙከራው የብቃት ማረጋገጫ በማይጠይቁ የንግድ ዘርፎች ላይ ለአራት ወራት ይካሄዳል ብለዋል።

ቴክኖሎጂው በቀጣዩ አመት ወደ ተግባር እንደሚገባም ሚኒስትሩ አስታውቀዋል።

በታሪክ አዱኛ-ኤፍ.ቢ.ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram