ነባሮቹ አመራሮች በጡረታ መሸኘታቸው ተገቢ መሆኑን ምሁራኖች ገለጹ

አዲስ አበባ፡- አገሪቱንና ድርጅታቸውን ለረጅም ዓመታት ሲመሩ የነበሩ አምስቱ ከፍተኛ የሥራ አመራሮች በጡረታ መሸኘታቸው ተገቢ መሆኑን ምሁራን አስታወቁ፡፡ የፖለቲካ ሹመኞች የጡረታ ዕድሜ ገደብ ሊቀመጥለት እንደሚገባም አሳሰቡ፡፡

የህግ አማካሪና ጠበቃው አቶ ዝናቡ ይርጋ፤ አመራሮቹ መነሳታቸው ፍትሃዊና ወቅታዊ መሆኑን ጠቁመው፤ ረዘም ያለ ጊዜ ስልጣን ላይ የቆዩትን ማንሳቱ ትክክልና መቀጠል ያለበት ሂደቱ መሆኑን ተናግረዋል። የጡረታ ዕድሜ የሚቀመጠው በሲቪል ሰርቪስ ህጉ ብቻ መሆኑን የተናገሩት የህግ አማካሪው፤ በኢህአዴግ የፖለቲካ ሰነድም የፖለቲካ ሹመኞች የጡረታ ጊዜ ተካትቶ እውቅና ተሰጥቶት ቢተገበር መልካም መሆኑን ጠቁመዋል፡፡ ትግበራው ለአገሪቱ የለውጥ ፍላጎትና ሂደት መሰረታዊና ወሳኝ መሆኑንም ጠቅሰዋል፡፡
በፖለቲካው አሰራር የጡረታ ዕድሜ ገደብ እንደማያስቀምጥ በመጠቆምም፤ የሰዎቹ የጡረታ ሽኝት ከፖለቲካ ሹመት አኳይ ሲታይ የህግ ክፍተት አለው ብለዋል። ሲሰሩ የቆዩት የፖለቲካ ሥራ ስለነበር ከጡረታ ህግ አንጻር ተጠቅሶ መሸኘታቸው ከህግ አግባብ ውጭ እንደሚሆን አስረድተዋል፡፡

አገሪቱ ለሥራ ብቁ የሆኑ፣ የዕድሜ ፈተና እና የእውቀት ችግር የሌለባቸው ሰዎች እንደሚያስፈልጋት ገልጸው፤ በዚህ ረገድ የሰው ኃይል እጥረት ባለመኖሩም በዕድሜ የገፉትን በክብር እንዲያርፉ በማድረግ በወጣቶች የመተካት ሂደቱ በፍትሃዊነት ሊቀጥል ይገባል ብለዋል፡፡
በመቀሌ ዩኒቨርሲቲ የፖለቲካ ሳይንስ መምህር አቶ መሀሪ ዮሐንስ የተወሰደው እርምጃ ተገቢ ሆኖም ግን የዘገየ መሆኑን ተናግረዋል፡፡ የአገሪቱ ስልጣን እርስት ሳይሆን ብቃት ያለው የሚያገለግልበት ቦታ መሆኑን በመጠቆምም፤ ብዙ ወጣቶች እያሉ በዕድሜ የሸመገሉ ሰዎች መደበኛ የመንግሥት ስልጣን ይዘው መቆየት አልነበረባቸውም፤ መተካካት መኖር ነበረበት ብለዋል፡፡ የተወሰደው እርምጃም የዘገየ ቢሆንም ተገቢ መሆኑን ጠቁመዋል፡፡
«አንድ ሰው በአንድ ቦታ ላይ ብዙ ጊዜ በቆየ ቁጥር ቡድንተኝነትንና የጥቅም መተሳሰርን ሊፈጥር ይችላል» ያሉት አቶ መሀሪ፤ የተወሰደውን እርምጃ እንደሚደግፉት ጠቁመዋል፡፡ የተሻለ ሰው ተተክቶ አገሪቱን ወደፊት ማራመድ እንደሚገባ ገልጸዋል፡፡ በአዲስ አበባ ዩኒቨርሲቲ የምጣኔ ሀብትና ፖለቲካ ሳይንስ ምሑር ዶክተር ቆስጠንጢኖስ በርኸ ተስፋ በበኩላቸው፤ በጡረታ መገለል የተለመደ አሰራር መሆኑን ጠቁመው፣ ሰዎች በተወሰነ ጊዜ ማረፍ አለባቸው ሲሉ ተናግረዋል፡፡ በተለይም ከፍተኛ ችግር ባለበት ጊዜ እርምጃው የሚጠበቅና ሂደቱም ለዕድገት ከፍተኛ አስተዋጽኦ እንደሚያበረክት ገልጸዋል፡፡
«ሰው ዕድሜው ሲገፋ ማረፍ አለበት፡፡ የአገሪቱ ችግርም የእነርሱ ችግር ብቻ አይደለም፡፡ ስለዚህ እስከ እድሜ ልካቸው መስራት የለባቸውም» ብለዋል፡፡ አሰራሩ ተለምዶ ረጅም ጊዜ ሥራ ላይ የቆዩ ግለሰቦችን በክብር የመሸኘትና በወጣቶች የመተካት እርምጃው መቀጠል እንዳለበትም አሳስበዋል፡፡

ዘላለም ግዛው

Share your thoughts on this post