በጥቁር የውጭ ምንዛሬ ገበያ እያሽቆለቆለ መጥቷል

በጥቁር የውጭ ምንዛሬ ገበያ የዶላር የምንዛሬ ዋጋ ከሰሞኑ እያሽቆለቆለ መጥቷል።

በአሁኑ ወቅትም በጥቁር የውጭ ምንዛሬ ገበያ ያለው የውጭ ምንዛሬ ተመን ወደ ባንኮች ተመን እየተጠጋ መሆኑ ተሰምቷል።

የሀገሪቱ አምራች ኢንዱስትሪ የሚጠበቅበትን የውጭ ምንዛሬ ማምጣት ተስኖት አለመረጋጋቱም ተጨምሮበት የውጭ ምንዛሬ እጥረቱ ከፍተኛ የሚባል ደረጃም ላይ መድረሱ የሚታወስ ነው።

ዘላቂ መፍትሄ አይሁን እንጂ የተባበሩት አረብ ኤምሬቶች 2 ቢሊየን ዶላርን በኢትዮጵያ ለሚደረግ የውጭ ቀጥታ ኢንቨስትመንት 1 ቢሊዮን ዶላር ለውጭ ምንዛሬ እጥረትን ለማቃለል ኢትዮጵያ ብሄራዊ ባንክ እንደምታስቀምጥ ተናገረች።

ጠቅላይ ሚኒስትር ዶክተር አብይ አህመድም ባሳለፍነው አርብ ሰኔ 2010 ዓ.ም በህዝብ ተወካዮች ምክር ቤት ተገኝተው ባደረጉት ንግግር፥ ሰሞኑን በጥቁር የውጭ ምንዛሬ ገበያ የዶላር ምንዛሬ ዋጋ በተወሰነ ደረጃ ቀንሷል ማለታቸው ይታወሳል።

ጠቅላይ ሚኒስትሩ በንግግራቸው፥ “አዳዲስ ዶላሮች እየገቡ ስለሆነ በጥቁር ገበያ ዶላር የያዛችሁ ሰዎች በአፋጣኝ በባንክ ገበያ የማትለውጡት ከሆነ እናንተንም ችግር ውስጥ ስለሚያስገባ ብታስቡበት” በሚል መልክት ማስተላለፋቸው ይታወሳል።

ይህንን ተከትሎም የአሜሪካን ግምጃ ቤት ተሰብስቦ የወለድ ምጣኔ ከፍ አለ ወይስ ዝቅ አለ በሚል የሚተራመሰውን ገበያ ዓይነት ኢትዮጵያ ውስጥም በጥቁር የውጭ ምንዛሬ ገበያ ላይ ከፍተኛ ጉዳት ታይቷል።

ይህ ዜና እስከተጠናቀረበት ጊዜ ድረስ አንድ የአሜሪካን ዶላር ቀድሞ ሲሸጥበት ከነበረው 36 ብር በጣም መቀነሱም ተነግሯል።

በአሁኑ ወቅትም አንድ የአሜሪካ ዶላር በጥቁር የውጭ ምንዛሬ ገበያ ከ28 ብር እስከ 30 ብር ድረስ ወርዶ ወደ ባንኮች ተመን እየተጠጋ መሆኑ ተሰምቷል።

አሁን ግን የህገወጡ ዶላር ምንዛሬ በእጅጉ ወርዶ ከህጋዊው ምንዛሬ 1  ብር ልዩነት ላይ ደርሷል።

በጥቁር የውጭ ምንዛሬ ገበያ ላይ የተሰማሩ ሰዎች የዶላር የምንዛሬ ዋጋ በዚህ ደረጃ የወረደበት ምክንያት ግልጽ እንዳልሆነላቸው በመግለጽ፤ በአሁኑ ወቅት ዶላርን የመግዛት ፍላጎታቸው እንደቀነሰ ነው የሚናገሩት።

የጥቁር የውጭ ምንዛሬ ገበያ ሁኔታን በቅርበት የሚከታተሉ ሰዎች እና ባለሙያዎች ደግሞ በጥቁር የውጭ ምንዛሬ ገበያ እንዲዳከም ምክንያት የሆነው በሀገሪቱ እየታየ ያለው ለውጥ ነው ይላሉ።

Share your thoughts on this post