በጠቅላይ ሚኒስትር ዶ/ር አብይ ትዕዛዝ መሰረት የመከላከያ ሀይሉ የፀጥታ ችግር የተፈጠረባቸውን አካባቢዎች ማረጋጋት ጀምሯል- አቶ ሞቱማ መቃሳ

በጠቅላይ ሚኒስትር ዶክተር አብይ አህመድ ትዕዛዝ መሰረት የመከላከላያ ሀይሉ የፀጥታ ችግር በተፈጠረባቸው የማረጋጋት ስራ መጀመሩን የመከላከያ ሚኒስትሩ አቶ ሞቱማ መቃሳ አስታወቁ።

ከጥቂት ቀናት በፊት በኦሮሚያና ኢትዮ- ሶማሌ ክልል አዋሳኝ እና በአንዳንድ የሀገሪቱ አካባቢዎች ግጭቶች ተከስተው በንፁሃን ለሞትና ለአካል ጉዳት ተዳርገዋል።

የኤፌዴሪ ጠቅላይ ሚኒስትርና የጦር ሀይሎች ጠቅላይ አዛዥ ዶክተር አብይ አህመድም በትናትናው ዕለት የፌዴራል የፀጥታ ሀይሎች በአካባቢዎቹ ተሰማርቶ የማረጋጋት እና አጥፊዎችን ለህግ የማቅረብ ስራ እንዲሰማራ ትዕዛዝ አስተላልፈዋል።

ይህንን ትዕዛዝ ተከትሎ የኤፌዴሪ መከላከያ ሀይል ግጭት በተከሰተባቸው አከባቢዎች መሰማራቱን የመከላከያ ሚኒስትሩ አቶ ሞቱማ መቃሳ ለፋና ብሮድካስቲንግ ኮርፖሬት ተናግረዋል።

አቶ ሞቱማ፥ “ትናንት በተሰጠው ትእዛዝ መሰረትና ሁለቱም የክልል መስተዳድሮች የፌዴራል የፀጥታ አካል እንዲገባ በወሰኑት መሰረት የመከላከያ ሰራዊትና የፌዴራል ፖሊስ ይግባ በተባለበት የተመረጡ ቦታ ላይ እየገባ ነው” ብለዋል።

የመከላከያ ሰራዊቱ በተሰጠው አቅጣጫ መሰረት ወደ አካባቢዎቹ በመግባት የማረጋጋት ስራ እየሰራ መሆኑንም ነው አቶ ሞቱማ ያስታወቁት።

ሚኒስትሩ በባለፈው ሳምንት በቦረና፣ ሞያሌ፣ ምስራቅ ሀረርጌና በሌሎች አካባቢዎች ከሌላው ጊዜ ለየት ያለ ግጭት እንደተከሰተ ገልፀዋል።

በአካባቢው ከዚህ በፊት በተመሳሳይ ሁኔታ ግጭቶ የተከሰቱ ቢሆንም የሰሞኑ ግጭት ግን ሰፊ አካባቢዎች የሸፈነ እና የበርካታ ዜጎች ህይወት ያለፈበት ነው ብለዋል።

ወደ አከባቢው የተሰማራው የመከላከያ ሀይልም ግጭት በተከሰተባቸው ስፍራዎች ከክልልና ፌደራል ፀጥታ አካላት ጋር በመተባበር ህግን የማስከበርና የማረጋጋት ስራ እንደሚሰራ ሚኒስትሩ አስታውቀዋል።

የመከላከያ ሀይሉ የማረጋጋት ስራ ሲሰራ በህግና ስርዓት ተመረቶ በጥንቃቄ ተልዕኮውን እንዲወጣ የሚያስችል አካሄድን ይከተላል ብለዋል።

ሚኒስትሩ ከግጭቱ ጀርባ ያሉ አካላት በሀገረቱ አሁን እየታየ ያለው ሰላምና መረጋጋት እንዲቀጥል የማይፈልጉ ሀይሎች ናቸው ያሉ ሲሆን፥ የእነዚህ አካላት ማንነት እና ዝርዝር ጉዳዮች በቀጣይ ይገለፃል ብለዋል።

ከግጭቱ ጀርባ ያለውን አካል ነጥሎ የማውጣትና የማስታገስ ተልዕኮውን እንደሚወጣ ያረጋገጡ ሚኒስትሩ ግጭት የተከሰተባቸውን አካባቢዎች በአጭር ጊዜ ወደ መረጋጋት እንደሚመለሱ ተናግረዋል።

ሚኒስትሩ አያይዘውም መከላከያ ሀይሉ የሁሉም ኢትዮጵያውያን የሰላም ዋስትና ስለሆነ በዚህኛው ተልዕኮም የሁሉንም ህዝቦችና ብሄሮች ሰላም እኩል ያስጠብቃል ብለዋል።

 

በዳዊት መስፍን – ኤፍ.ቢ.ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram