በጋምቤላ ክልል ልማት ይረጋገጥ ዘንድ ወሳኝ የሆነውን ሰላም ለማስፈን የፌደራል መንግስት ከክልሉ ጋር በጋራ እንደሚሰራ ጠ/ሚ ዶ/ር አብይ ገለፁ

በጋምቤላ ክልል ልማት እና ኢንቨስትመንት እንዲስፋፋ ወሳኝ የሆነውን ሰላም ለማስፈን የፌደራል መንግስት ከክልሉ መንግስት ጋር በጋራ እንደሚሰራ የኢፌዴሪ ጠቅላይ ሚኒስትር ዶክተር አብይ አህመድ ገለፁ።

ጠቅላይ ሚኒስትሩ ከትናንት ጀምሮ በክልሉ ጉብኝት ያደረጉ ሲሆን፥ ከተለያዩ የህብረተሰብ ክፍሎች ጋርም ውይይት አድርገዋል።

ዛሬም በጋምቤላ ስታዲየም ለተሰበሰቡ ለክልሉ ነዋሪዎች መልዕክት አስተላልፈዋል።

ጠቅላይ ሚኒስትሩ ለመላው የክልሉ ህዝቦች ባስተላለፉት መልዕክት የጋምቤላ ህዝቦች የኢትዮጵያ ድንበር እና ሉዓላዊነት እንዲጠበቅ የከፈሉት ውለታ ከቀሪ ኢትዮጵያውያን ልብ ውስጥ የሚጠፋ አይደለም ብለዋል።

የክልሉ ህዝቦች ለጠረፋማ ቦታዎች እያደረጉት ላለው ጥበቃ ምስጋናቸውን አቅርበው፥ የፌደራሉ መንግስት በቀጣይ ድጋፍ እንደሚያደረግ ነው ያስታወቁት።

በንግግራቸው ከኮሪያ ዘማቾች ጀምሮ ለሀገሪቱ ሉዓላዊነት መስዋዕትነት የከፈሉ የክልሉን ጀግኖችን ጠቅሰዋል።

የክልሉ ህዝቦች ከምንም በላይ ለኢትዮጵያ አንድነት መስዋዕትነት የከፈሉ አባቶቻቸውን እያሰቡ ለሀገሪቱ አንድነት እና ሉዓላዊነት መጠበቅ ሁሌም እንዲሰሩ አሳስበዋል።

በክልሉ ልማት እና ኢንቨስትመንት እንዲስፋፋ በቅድሚያ አስተማማኝ ሰላም መስፈን ይገባዋል ያሉት ጠቅላይ ሚኒስትሩ፥ ይህም እንደሆን የፌደራል መንግስት ከክልሉ ጋር በጋራ ይሰራል ብለዋል።

በጋምቤላ ክልል በዩኔስኮ የተመዘገቡ ጥብቅ ደኖችም ተጠብቀው እንዲቆዩ የኢፌደሪ መንግስት ድጋፉን እንደሚያደርግ አረጋግጠዋል።

የጋምቤላ ክልል ርእሰ መስተዳድር ጋትሉዋክ ቱት በበኩላቸው በክልሉ በስፋት የሚገኙትን የዓሳ እና ቀንድ ከብት ሀብቶች የክልሉ ነዋሪዎች በዘመናዊ መንገድ አልምተው ተጠቃሚ እንዲሆኑ የፌደራል መንግስት ድጋፍ እንዲያደርግ ጠይቀዋል።

በተደጋጋሚ ከደቡብ ሱዳን እየተነሱ በክልሉ አዋሳኝ አካባቢዎች ጥቃት ለሚፈፅሙት የሙርሌ ጎሳዎች ጉይም የፌደራል መንግስቱ ዘላቂ መፍትሄ እንዲያስቀምጥ ነው የጠየቁት።

በመጨረሻም ለኢፌዴሪ ጠቅላይ ሚኒስትር እና ለኦሮሚያ ብሄራዊ ክልላዊ ምንግስት ርእሰ መስተዳድር አቶ ለማ መገርሳ የክልሉን የቱሪስት መስህብ የሚወክል ስጦታ ተበርክቷል።

ጠቅላይ ሚኒስትር ዶክተር አብይ የጋምቤላ ጉብኝታቸውን አጠናቀው ወደ አዲስ አበባ ተመልሰዋል።

 

በሀይለሚካኤል ዴቢሳ

Share your thoughts on this post