በደቡብ ክልል አንዳንድ አካባቢዎች የተስተዋሉትን የፀጥታ ችግሮች በፍጥነት ለመቅረፍ እንደሚሰራ ደኢህዴን ገለፀ

የደቡብ ኢትዮጵያ ህዝቦች ዴሞክራሲያዊ ንቅናቄ /ደኢህዴን/ ከፍተኛ አመራሮችና ከሁሉም የክልሉ አካባቢዎች የተውጣጡ አመራሮች ከሀምሌ 9 እስከ 10 በወቅታዊ፣ ሀገራዊና ክልላዊ ሁኔታዎች ላይ ዝርዝር ግምገማዎችንና ውይይቶች በማካሄድ ባለዘጠኝ ነጥብ የአቋም መግለጫ አውጥተዋል።

በክልሉና ከአጐራባች ክልሎች ጋር የተፈጠሩ ሰላም ማጣትና ደህንነት ወደ ነበረበት ሰላማዊ ሁኔታ ለመመለስ የሚያስችል ግምገማንም አድርገዋል።

ከውይይት በኋላ ድርጅቱ ባወጣው መግለጫ የክልሉ ሰላም ወደነበረበት ለመመለስ ጥረቶች የተደረጉ ቢሆንም፥ አስተማማኝ ሰላምና ደህንነት ማስፈን ያለመቻሉን ገልጿል።

በመሆኑም የክልሉን ሰላምና ደህንነት ወደ ነበረበት ለመመለስ ከወትሮው በተለየ፣ ፍጥነት ባለውና የህግ የበላይነትን ባረጋገጠ መልኩ እንደሚሰራ በመግለጫው አስታውቋል።

በክልሉ በተፈጠሩ ግጭቶች ምክንያት የተፈናቀሉ የህብረተሰብ ክፍሎች በሀዋሳ፣ ወልቂጤና ሲዳማ ዞን በ15 ቀናት ውስጥ እንዲሁም እስከ ሐምሌ 25 ድረስ ደግሞ ከኦሮሚያ አዋሳኝ አካባቢ ጋር ተያይዞ የተፈናቀሉ ዜጎች በጌዲኦ ዞን፣ በሰገን ሀዝቦች ዞን አማሮና ቡርጂ ወረዳዎች እጅግ ባጠረ ጊዜ ውስጥ ወደቀያቸው እንዲመለሱ ከኦሮሚያ ክልልና ከፌዴራል መንግስት ጋር በመሆን ችግሩን ለመፍታት እንደሚሰራም ነው ያመለከተው።

እንዲሁም በሀገሪቱና በክልሉ እየተካሄደ ያለውን ለውጥ በሚፃረር መንገድ አዳዲስ ግጭቶች እንዲፈጠሩ ሊያደርጉ የሚችሉ ችግሮችን አመራሮቹ በመለየት ባለመዘናጋት አስቀድመው ህዝቡን በማሳተፍ በመስራት እንዲሁም አመራሩ የፀጥታ መዋቅሩን በማስተባበር ወደተግባር እንደሚገቡም መግለጫው አትቷል።

በተጨማሪም በክልሉ በተፈጠሩ ችግሮች ውስጥ እጁ ያለበት ማንኛውም አካል የሀገሪቱ ህግ በሚፈቅደው መሰረት በክልሉና በፌደራል ደረጃ የተጀመሩ የምርመራ ውጤቶች ሲጠናቀቁ ተጠያቂ እንደሚያደርግም አስታውቋል።

አሁን በሀገሪቱና በክልሉ እየመጡ ያሉ ለውጦች እጅግ የሚበረታቱና ቅቡል ቢሆኑም ለውጡን በሚፃረር መንገድ ደግሞ እየተደረጉ ያሉ አካሄዶች ጋብ ሊሉ ይገባቸዋልም ብላል ደርጅቱ።

በመጨረሻም ጥላቻን፣ ቂምን፣ ክፋትን፣ አገልጋይ አለመሆንን በመቀነስ፣ መልካም ልምዶችና ባህሎችን በማካፈል፣ ፍቅር፣ መልካምነት፣ አንድነት፣ ይቅርታንና መቻቻልን በማብዛት በጥቅሉ ከልዩነት ይልቅ በመደመር የተጀመረው ግዙፍ ሀገራዊ ለውጥ እውን ለማድረግ እንዲሁም ግለቱን ጠብቆ የህዝቡን አንድነትና ተጠቃሚነትን አጠናክሮ እንዲቀጥል ለመስራት ድርጅቱ በመግለጫው ቃል ገብቷል።

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram