በደቡብ ሱዳን የተደረሰው የተኩስ አቁም ስምምነት በሰዓታት ውስጥ ተጣሰ

የደቡብ ሱዳን ተፋላሚ ሃይሎች የደረሱትን የተኩስ አቁም ስምምነት በሰዓታት ውስጥ መጣሳቸው ተሰማ።

የሃገሪቱ ተቀናቃኝ ሃይሎች ባለፈው ማክሰኞ በ72 ሰዓታት ውስጥ ተግባራዊ የሚሆን የተኩስ አቁም ስምምነት በሱዳን መድረሳቸው ይታወሳል።

ይህን ተከትሎም የተኩስ አቁም ስምምነቱ ዓርብ እኩለ ሌሊት ላይ ተግባራዊ መደረግ ጀምሮ ነበር።

ይሁን እንጅ የተኩስ አቁም ስምምነቱ ዛሬ ንጋት ላይ መጣሱን የመንግስት ተቀናቃኝ ሃይሎች ገልጸዋል።

የመንግስት ዋነኛ ተቀናቃኝ ሃይል ቃል አቀባይ የሆኑት ላም ፖል ጋብርኤል፥ የመንግስት ወታደሮችና የሱዳን ታጣቂ ሃይሎች ንጋት ላይ ከፍተኛ ጥቃት መፈጸማቸውን ተናግረዋል።

ንጋት ላይ የተጀመረው ጥቃት መቀጠሉን የገለጹት ቃል አቀባዩ፥ የመንግስታቱ ድርጅት ሰላም አስከባሪ ሃይልና ጉዳዩን የሚከታተሉ አካላት አፋጣኝ መፍትሄ ሊወስዱ ይገባል ብለዋል።

ተቀናቃኝ ሃይሎችም ራሳቸውን የመከላከል መብት እንዳላቸው አንስተዋል።

የመንግስት ቃል አቀባይ አቴኒ ዌክ አቴኒ በበኩላቸው፥ ተቀናቃኝ ሃይሎች ጥቃት በመፈጸም ስምምነቱን ጥሰዋል ነው ያሉት።

በደቡብ ሱዳን የተደረሰው የተኩስ አቁም ስምምነት በተደጋጋሚ ይጣሳል፤ ከዚህ ቀደም ባለፈው ታህሳስ ወር የተደረሰው የተኩስ አቁም ስምምነትም በተደረሰ በሰዓታት ውስጥ መጣሱ የሚታወስ ነው።

በሃገሪቱ በተከሰተው የእርስ በርስ ግጭት ሳቢያ በርካቶች ለህልፈትና ለስደት ተዳርገዋል።

ከዚያን ጊዜ ወዲህ በሃገሪቱ ሰላም ለማስፈን የተለያዩ ጥረቶች ቢደረጉም አንዳቸውም ውጤት አላስገኙም።

ጉዳዩን የሚከታተሉ ታዛቢዎች ደግሞ በዋናነት የሃገሪቱን ፕሬዚዳን ሳልቫ ኪርን ጨምሮ ሪክ ማቻርና ሌሎች የፖለቲካ መሪዎች ላይ ጠንካራ እርምጃ ሊወሰድ ይገባል ባይ ናቸው።

ዛሬ የተጣሰውን የተኩስ አቁም ስምምነት ተከትሎም ሳልቫ ኪርና ሪክ ማቻር የጉዞ እገዳን ጨምሮ በርካታ ማዕቀብ ይጠብቃቸዋል እየተባለ ነው።

 

 

ምንጭ፦ apnews.com

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram