በኦሮሚያ ክልል ከሀሰተኛ የትምህርት ሰነድ ጋር በተያያዘ ከ15 ሺህ ሰራተኞች በላይ ጥቆማ ቀረበባቸው

በኦሮሚያ ክልል ባለፉት ስድስት ወራት ብቻ በተካሄደ የትምህርት ማስረጃ ሰነድ የማጣራት ስራ ከ15 ሺህ በላይ በክልሉ በሚገኙ የመንግስት ተቋማት የሚሰሩ ሰራተኞች ላይ ጥቆማ መቅረቡን የኦሮሚያ ፐብሊክ ሰርቪስ እና ሰዉ ሀብት ልማት ቢሮ አስታወቀ።

ቢሮ ጥቆማውን በተለያዩ ዘዴዎች በመጠቀም ያሰባሰበ ሲሆን፥ እስከ መጪው ሰኔ ወር መጨረሻ ጥቆማውን በማጣራት ወንጀሉ የተገኘባቸው ግለሰቦች ከስራ ከማሰናበት ጀምሮ የተለያዩ እርምጃዎችን እወስዳለሁ ብሏል።

የኦሮሚያ ፐብሊክ ሰርቪስ እና ሰዉ ሀብት ልማት ቢሮም አሳሳቢነቱን በማጤን በክልሉ የሚገኙ የመንግስት ተቋማት ሰራተኞች ላይ የሀሰተኛ የትምህርት ሰነድ ማጣራት የጀመረው ባሳለፍነው ዓመት ነበር።

እስከ ሀምሌ 2009 ድረስ በሰጠው እራስን የማጋለጥ ጊዜ 6614 የመሆኑ ግለሰቦች ራሳቸዉን ያጋለጡ ሲሆን ከየቅርታ ጀምሮ ከደረጃቸው ዝቅ እስከሚል አስተዳደራዊ እርምጃ መውሰድ ችሏል።

ከእነዚህም 30 በመቶ የሚሆኑት ከቅጥራቸው ጀምሮ ሀሰተኛ የትምህርት ማስረጃ በማስያዝ የተቀጠሩ በመሆናቸዉ ከስራ ገበታቸዉ እንዲሰናበቱ ተደርጓል ብለዋል የቢሮ ኃላፊ ዶክተር ቢቂላ ሁሪሳ።

ይህ የማጣራት ተግባርም በመቀጠል የተከናወነ ሲሆን እስካሁን ከ15 ሺህ በላይ የሚሆኑ የመንግስት ሰራተኞች ላይ ጥቆማ ቀርቧል ብለዋል ዶክተር ቢቂላ።

ባለፉት ወራት ብቻ ይህን ያህል ቁጥር ያለዉ ጥቆማ ይደርሰናል ብለን አልጠበቅንም ያሉት የቢሮ ሃላፊዉ ቁጥሩ ከተጠበቀዉ በላይ የበዛ በመሆኑ በቢሮ ደረጃ ለማጣራት የታቀደዉን እቅድ በማስቀረት በቢሮዎች አዋሳኝ ጉድኝት የሚጣራ ይሆናል ብለዋል።

ሀሰተኛ የትምህረት ማስረጃ አቅርበዋል ተብለዉ ጥቆማ ከተደረገባቸዉ ሰራተኞች ዉስጥ እንደ ጤና ትምህርት፣ ግንባታ እና ሌሎች በሰዎች ብሎም በሀገሪቱ ዕድገት ላይ አሉታዊ ተጽእኖ ሊያሳድሩ የሚችሉ ሙያዎች ላይ በስፋት መገኘቱ ችግሩን አሳሳቢ ያደርገዋል ብለዋል።

ድርጊቱ ከዝቅተኛ ባለሙያ እስከ ከፍተኛ የትምህርት ተቋማት የሚታይ መሆኑንም አስረድተዋል።

ዶክተር ቢቂላ ችግሩ ድንበር ዘለል እንደ መሆኑ መጠን ከክልሎች እና ከፌደራል ተቋማት ጋር በጋራ ለመስራት ከስምምነት ላይ መድረሳቸዉንም ተናግረዋል።

ድርጊቱን ከስር መሰረቱ ለመግታት በቴክኖሎጂ መታገዝ እና ጊዜያዊ መፍትሄም ቢሆን በተለይ አዳዲስ ተቀጣሪዎች ላይ ትኩረቱን ያደረገ አሰራር ተዘርግቷል ብለዋል።

ለዚህ ችግር ዘላቂ መፍትሄ ለመስጠት በተለይ ከፍተኛ የትምህርት ተቋማት የተማሪዎቻቸዉን የትምህርት ማስረጃ በዘመናዊ መልኩ በመረጃ ቋት ማስገባት መፍትሄ ነዉ የሚሉት ደግሞ የፐብሊክ ሚኒስቴር እና በሰዉ ሃብት ለማት ሚኒስትሩ አቶ ታገሰ ጫፎ ናቸዉ።

ይህ አሰራር ቀጣሪ ተቋማት የሚቀጥሩትን ግለሰብ ባሉበት ሆነዉ ለማጣራት ያግዛል የሚሉት ሚኒስትሩ አሁን ላይ በሙከራ ደረጃ በአዲስ አበባ እና አዳማ ሳይንስና ቴክኖሎጂ ዩኒቨርስቲዎች በሙከራ ደረጃ የሁሉንም ተማሪዎች ማስረጃ ወደ መረጃ ቋት (ዳታቤዝ) የማስገባት ስራ ተጠናቋል ብለዋል።

እንዲሁም የትምህርት ጥራቱን ለማስጠበቅ እና ድርጊቱን ለመግታት ያስችላል የተባለ ሀገር አቀፍ እና በየዘርፉ ወጥ የሆነ የብቃት ማረጋገጫ ፈተና በተቋም ደረጃ ለመስጠት በዝግጅት ምዕራፍ ላይ መሆኑንም ተናግረዋል ሚኒስትሩ፡፡

በጊዜያዊነትም የትምህርት ማስረጃዎችን በየተቋማት ሰርቨር ዉስጥ የማስገባት ስራ እየተከናወነ ይገኛል ብለዋል።

በመጨረሻም የሐሰተኛ ሰነድ የማጣራት ሂደቱ በኃላፊነት ደረጃ የሚገኙ ግለሰቦችም ስለተሳተፉበት የማጣራት ሂደቱን ፈታኛ ያደርገዋል ተብሏል፡፡

በሀይለሚካኤል አበበ – ኤፍ.ቢ.ሲ

Share your thoughts on this post