በኢትዮ- ኤርትራ ወቅታዊ ሁኔታ ላይ የተላለፈው ውሳኔ የሃገራቱን ግንኙነት የሚያሻሽል ነው – ጠ/ሚ ዶክተር አብይ

የኢህአዴግ ስራ አስፈጻሚ ኮሚቴ የኢትዮ- ኤርትራን ወቅታዊ ሁኔታ በተመለከተ ያሳለፈው ውሳኔ የሁለቱን ሃገራት ግንኙነት የሚያሻሽል መሆኑን የኢፌዴሪ ጠቅላይ ሚኒስትር ዶክተር አብይ አህመድ ተናገሩ።

ጠቅላይ ሚኒስትሩ ዛሬ በተጀመረው 4ኛው ሃገር አቀፍ የፀረ ሙስና ጥምረት ጉባኤ ላይ በመገኘት ባደረጉት ንግግር የኢህአዴግ ስራ አስፈጻሚ ኮሚቴ ባሳላፈው ውሳኔ ላይ ማብራሪያ ሰጥተዋል።

የተላለፈው ውሳኔም ሁለቱ ሃገራት ባለፉት አመታት የነበራቸውን ግንኙነት ሊያሻሽል የሚችል መሆኑን ተናግረዋል።

ሃገራቱ ባለፉት አመታት በነበራቸው ግንኙነት ሳቢያ ድንበር ላይ የሰፈረው ወታደርም፥ ለጦርነት በሚያደርገው ዝግጅትና ሊፈጸም ስለሚችል ጥቃት በማሰብ በስነ ልቦና መጠቃቱንም ነው የተናገሩት።

አሁን ላይም ይህ ሁኔታ አብቅቶ በሙሉ አቅም ወደ ሰላም መመለስ እንደሚገባም አጽንኦት ሰጥተዋል።

ባለፉት ሁለት ወራት በሃገሪቱ የነበረውን የሰላም ሁኔታ ለማረጋጋት በተሰራ ስራ የአስቸኳይ ጊዜ አዋጁ መነሳቱንም በንግግራቸው ጠቅሰዋል።

አሁን ላይ በሃገሪቱ እየታየ ያለው የሰላም ድባብም ለኢትዮጵያ ብቻ ሳይሆን ለቀጠናው አስፈላጊ መሆኑንም አስረድተዋል።

ኢትዮጵያም በቀጠናው ብሎም በአፍሪካ ሰላምን የማረጋገጥ ሃላፊነት እንዳለባት ጠቅሰው፥ በኢትዮጵያና ኤርትራ መካከል ያለውን ትስስር በማጠናከር ሁለት ወንድማማች ህዝቦች እንዲገናኙ ማድረግ ይገባልም ነው ያሉት።

መላው የሃገሪቱ ህዝቦችም ኢትዮጵያ ይህን ቀዳሚ እርምጃ የመውሰድ ሃላፊነት እንዳለባት መገንዘብ ያስፈልጋቸዋል ብለዋል።

ኢትዮጵያና ኤርትራ ባለፉት አመታት በነበራቸው ግንኙነት ከስጋትና ውጥረት ውጭ ያተረፉት የለም ያሉት ጠቅላይ ሚኒስትሩ፥ ሙሉ አቅምን ወደ ሰላም፣ ፍቅርና እርቅ በማዞር እና ሃሳብን ከሚከፋፍሉ ነገሮች በመራቅ የኢትዮጵያን ህዳሴ ማረጋገጥ እንደሚገባም ገልጸዋል።

ኢትዮጵያውያንም ከትናንሽ ጥላቻዎችና ግጭቶች በመውጣትና ድህነትን በመዋጋት የሃገሪቱን ሰላም፣ እድገትና ብልፅግና ለማረጋገጥ እንዲነሱም ጥሪያቸውን አስተላልፈዋል።

ኤፍ ቢ ሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram