በአዲግራት ከተማ ነዋሪዎች ኢህአዴግ በኢትዮ-ኤርትራ ጉዳይ ላይ ያሳለፈውን ውሳኔ በመቃወም ሰለማዊ ሰልፍ አካሄዱ

የአዲግራት ከተማ ነዋሪዎች የኢህአዴግ ስራ አስፈፃሚ ኮሚቴ የኢትዮ-ኤርትራ ጉዳይን አስመልክቶ ያሳለፈውን ውሳኔ በመቃወም ዛሬ ሰለማዊ ሰልፍ አካሄዱ።

ሰልፈኞቹ፥ የኢህአዴግ ስራ አስፈፃሚ ኮሚቴ የአልጀርስ ስምምነትና የድምበር ኮሚሽን ውሳኔን ያለ ምንም ቅድመ ሁኔታ ሙሉ በሙሉ መቀበሉን በመቃወም ነው ሰላማዊ ሰልፉን ያካሄዱት።

ነዋሪዎቹ በኢትዮጵያና ኤርትራ ህዝብ መካከል ሰላም ለመፍጠር የሚደረገው ጥረት እንደሚደግፉ የገለፁ ሲሆን፥ ይሁን እንጂ “መሬትን አሳልፎ በመስጠት የሚገኝ ሰላም የለም” ብለዋል።

ለዚህም “በሉአላዊነታችን አንደራደርም፤ የህዝብ ተወካዮች ምክር ቤት የኢህአዴግ ስራ አስፈፃሚ ውሳኔን ውድቅ እንዲያደርገ እንጠይቃለን!” የሚሉ መልእክቶችን ያዘሉ መፎክሮች በመያዝ ነበር ላማዊ ሰፉን ያካሄዱት።

በሰልፉ በሺዎች የሚቆጠሩ የአዲግራት ከተማ ነዋሪዎችና የኢሮብ ብሄረሰብ ተወላጆች የተሳተፉ ሲሆን፥ መንግስት ከህዝብ ጋር መወያየትና ውሳኔውን ማስተካከል እንዳለበት ጥሪ አቅርበዋል።

የአዲግራት ከተማ ከንቲባ አቶ ገብረመድህን ስዩም፥ ህዝቡ በሰላማዊ ሰልፉ ያቀረባቸውን ጥያቄዎች ለሚመለከተው አካል በማድረስ መልስ እንሰጣለን ሲሉ ለፋና ብሮድካስቲንግ ኮርፖሬት ተናግረዋል።

በተመሳሳይ የኢህአዴግ ስራ አስፈጻሚ ኮሚቴ በኢትዮ- ኤርትራ ጉዳይ ላይ ያሳለፈውን ውሳኔ በመቃወም የኢሮብ ወረዳ፣ የባድመ ከተማ እና ነዋሪዎችና የዓዲ ፀፀር ነዋሪዎች ሰሞኑን ሰላማዊ ሰልፍ ማካሄዳቸው ይታወሳል።

በሳራ ሀጎስ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram