በተለያዩ ወራት አራት ቤተሰቦቹ የሞቱ በማስመሰል ከዕድር 12 ሺህ ብር ያጭበረበረው ግለሰብ በእስራትና በገንዘብ ተቀጣ

በአዲስ አበባ ቦሌ ክፍለ ከተማ ወረዳ 9 ሰላም ሰፈር እየተባለ በሚጠራው አካባቢ ነዋሪ የሆነው ግለሰብ በተለያዩ ወራት አራት ቤተሰቦቹ የሞቱ በማስመሰል ከዕድርቤት በሐሰት 12 ሺህ ብር አጭበርብሮ በመገኘቱ በፍርድ ቤት በእስራትና በገንዘብ ተቀጣ፡፡

ተከሳሹ መሃመድ ሃሰን በሽሮ የሚባል ሲሆን የቅጣት ውሳኔውን የፌዴራል ከፍተኛ ፍርድ ቤት ቦሌ ምድብ 2ኛ ወንጀል ችሎት ቀርቦ ነው ውሳኔ የተላለፈበት።

በግለሰቡ መኞሪያ አካባቢ በሚገኝ የቅዱስ ገብርኤል መረዳጃ እድር ውስጥ ከ1997 ዓመተ ምህረት ጀምሮ በአባልነት መዋጮ ሲከፍል መቆየቱ በክሱ ተጠቅሷል።

የቦሌ ምድብ አቃቢህግ ክስ እንደሚያመላከተው ተከሳሹ በህዳር 29 ቀን 2010 ዓመተ ምህረት ወደ እድር ማህበሩ በማቅናት የባለቤቴ ወንድም ሞቶ ገጠር ቀብሬ ነው የተመልኩት ሲል ማመልከቻ ያስገባል።

ማመልካቻውን የተቀበሉ የእድር ማህበሩ ኮሚቴዎችም አንድ ሺህ ብር የሃዘን ማጽናኛ ክፍያ ይከፍሉታል።

በድጋሚ በጥር 19 ቀን 2010 ዓመተ ምህረት ደግሞ እናቴ ሞታለች ቀብሬያት ተመልሻለው ሲል ሃዘንተኛ በመምሰል ማመልከቻ አስገብቶ ኮሚቴዎችም ለእናት የሚገባውን ሁለት ሺህ ብር እንደከፈሉት ተነግሯል።

ተከሳሹ በሐሰት የገደላቸው የእናቱና የባለቤቱ ወንድም ሞት ሳይበቃው ተከሳሹ በየካቲት 11 ቀን 2010 ዓመተ ምህረት የባለቤቴ አባት ሞቶ ገጠር ቀብሬ መጣሁ ሲል ሃዘንተኛ መስሎ በድጋሚ ማመልከቻ ያቀርባል።

ይህን ማመልከቻ ተቀብለው ኮሚቴዎችም ሳይጠራጠሩ ለአባት ሞት የተመደበውን ሁለት ሺህ ብር የሃዘን ክፍያ እንደፈጸሙ ቦሌ ምድብ አቃቢህግ በክሱ ጠቅሷል።

ይህም ሳይበቃው ተከሳሹ ለኮሚቴዎቹ በየካቲት 11 ቀን 2010 ዓመተ ምህረት ለባለቤቴ አባት ሞት ቀብሬ መጥቼ ክፍያ መፈጸማቹ ይታወሳል አሁን ደግሞ ባለቤቴ የአባቷን አርባ ለማውጣት ገጠር ስትሄድ በመኪና አደጋ ስለሞተችና እኔም ቀብሬአት ስለመጣሁ የሚገባኝን የሃዘን ክፍያ እንድትፈጽሙልኝ ሲል በመጋቢት 24 ቀን 2010 ዓመተ ምህረት ማመልከቻ ማስገባቱን ተከትሎ ኮሚቴዎቹ ሳያቅማሙ ሰባት ሺህ ብር ክፍያ ይፈጽሙለታል።

ባጠቃላይ ተከሳሹ ዘመዶቹ ሳይሞቱ እንደሞቱ በማስመሰል ከእድሩ ማህበር 12 ሺህ ብር መቀበሉ በክሱ ተጠቅሷል።

በመጨረሻም ሀሳብ የገባቸው የእድሩ ኮሚቴዎች ባደረጉት ስብሰባ ክፍያውን አስመልከቶ ጥርጣሬ ስላደረባቸው ጉዳዩን ለማጣራት ከውሳኔ ደርሰው ማጣርት ይጀምራሉ።

በዚህ ጊዜም ከህዳር እሰከ መጋቢት ወራት ድረስ ሞተዋል የተባሉ ዘሞዶቹ አለመሞታቸውን በህይወት መኖራቸውን አራጋግጧል ይህንን ተከትሎም ለፖሊስም ጉዳዩን አቅርበዋል።

ጉዳዩን ከፖሊስ ጋር የመረመረው ቦሌ ምድብ አቃቢ ህግም በ1996 ዓመተ ምህርት የወጣውን የኢፌድሪ የወንጀል ህግ 692/1 በመተላለፍ በአታላይነት ወንጀል ፈጽሟል ሲል ክስ አቅርቧል።

ተከሳሹ በፌዴራል ከፍተኛ ፍርድቤት ቦሌ ምድብ 2ኛ ወንጀል ችሎት ቀርቦ ክሱ ተነቦለታል።

ተከሳሹ በችሎት ለቀረበለት የእምነት ክህደት ቃልም ድርጊቱን መፈጸሙን ያመነ ሲሆን፥ ጉዳዩን የመረመረው ፍርድ ቤትም ተከሳሹን በፈጸመው ወንጀል ጥፋተኛ ብሎታል።

ተከሳሹ አራት የቅጣት ማቅለያ ማለትም ድርጊቱን መፈጸሜን አምኛለው፣ በድርጊቱም ተጸጽቻለው፣ የቤተሰብ አስተዳዳሪ፣ የልጆች አባት ነኝ ሲል ለፍርድ ቤቱ የቅጣት ማቅለያ አቅርቧል።

ፍርድቤቱም ማቅለያውን በመቀበል ተከሳሹን በአንድ አመት ከስምንት ወራት እስራትና በ500 ብር የገንዘብ መቀጮ እንዲቀጣ ወስኗል።

 

 

በታሪክ አዱኛ – ኤፍቢሲ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram