በሲዳማ የዘመን አቆጣጠር 2011 ጀመረ

የሲዳማ ብሄር የዘመን መለወጫ ፊቼ ጫምበላላ በዓል ዛሬ በሃዋሳ ከተማ በተለያዩ በደማቅ ሥነ-ሥርዓቶች ተከብሯል። ከሁሉም የሲዳማ ዞን ወረዳዎች የተውጣጡ የሃገር ሽማግሌዎች፣ የአካባቢው ተወላጆች እንዲሁም የተለያዩ ቱሪስቶች በዓሉን ታድመዋል።

ቢቢሲ ያነጋገረው የአካባቢው ተወላጅ እና ጋዜጠኛ አለሙ አመዬ፤ ”ይህ የዘመን አቆጣጠረር የሲዳማ ብሄረሰብ የፀሃይ፣ የጨረቃ እና የከዋክብት የተፈጥሮ ኡደትን እያሰላ ዘመን የሚቆጥርበት ጥበብ ነው”ይላል።

የሃገር ሽማግሌዎች ”አያንቱዎች” ሲሆኑ የበዓሉን ቀን የሚቆጥሩት፤ ከእሮብ ጀምሮ በሲዳማ ብሄር አቆጣጠር 2011 ዓ.ም ነው።

ሁሉም ሰው በተለይ በሃገር ሽማግሌዎቹ ቤት ከበዓሉ አንድ ቀን በፊት ተሰባስቦ በዓሉን ማክበር ይጀምራል ይላል አለሙ።

ለበዓሉ ድምቀትም ”ቡርሻሌ” የሚባል ከቆጮ እና ከወተት የሚሰራ የአካባቢው ልዩ ባህላዊ ምግብ ይቀርባል።

የሲዳማ ብሄረሰብ የዘመን መቀበያ ከመሆኑም ባሻገር፤ ዘመዳሞች የሚጠያየቁበት፣ የተጣሉ ሰዎች የሚታረቁበት እንዲሁም ሃገር በቀል እውቀቶች ለተተኪው ትውልደ የሚተላለፍበት ትልቅ በዓል እንደሆነ አለሙ ይናገራል።

ከበዓሉ በፊት ምንም አይነት ሥጋ ማንኛውም ሰው አይመገቡም። ምክንያቱም በዓሉ የፍቅር ማሳያ ስለሆነ የቤት እንስሳት አይነኩም፤ ዛፍም ቢሆን አይቆረጥም ሲል ያስረዳል አለሙ።

በዓሉ በዚሁ የሚያበቃ አይደለም የሚለው አለሙ፤ በሃያ ሦስቱም የሲዳማ ወረዳዎች ከሁለት እስከ ሦስት ሳምንት ያህል ጊዜ በደማቅ ሥርዓት እና በተለያዩ ሃገረሰባዊ ጭፈራዎች እንደሚከበር ይገልጻል።

የማይዳሰሱ ባህላዊ ቅርሶችን በዋነኛነት የሚመዘግበው የዩኔስኮ በይነ-መንግሥታዊ ኮሚቴ ከህዳረ 20 እስከ 24 2008 በናሚቢያ መዲና ዊንድሆክ ባደረገው 10ኛ ስብሰባው፤ ለውሳኔ ከቀረቡለት 35 ባህላዊ ቅርሶች መካከል የሲዳማ ብሄር የዘመን መለወጫ የሆነውን ፍቼ ጫምባላላን የማይዳሰስ ባህላዊ ቅርስ ብሎ መዝግቦታል።

ፍቼ ጫምባላላ የሲዳማ ህዝብ የአዲስ ዓመት በዓል ብቻ ሳይሆን፤ በዓሉ በሚከበርበት ወቅት የሀገር ሽማግሌዎች ለተተኪዉ ትዉልድ ስለ ሥራ ክቡርነት እና ተግባብቶ፣ ተከባብሮ አብሮ መኖርን የሚያስተምሩበት መድረክ መሆኑን የ«ዩኔስኮ» ጋዜጣዊ መግለጫ አስቀምጧል።

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram