በምዕራብ ሸዋ ዞን ዳኖ ወረዳ ለተከሰተው ቅሬታ በጊዜያዊ እና ዘላቂ መፍትሄ ስምምነት ላይ ተደረሰ

በኦሮሚያ ክልል ምዕራብ ሸዋ ዞን ዳኖ ወረዳ በሁለት ቀበሌዎች የአማራ ተወላጆች የመሬት ይዞታ ባለቤትነት መብት ይረጋገጥልን ጥያቄ በሁለቱም ህዝቦች ጊዜያዊ እና ዘላቂ መፍትሄ ማምጣት የሚያስችል ምክክር ተደርጓል፡፡

የመሬት ባለይዞታነት መብት ይረጋገጥልን ጥያቄ አቅራቢዎቹ፡-
• ከ2 ሄክታር በላይ ያለን መሬት በህጋዊነት ተይዞ የባለቤትነት መብት አልተረጋገጠልንም፤
• 2 ሄክታር ያልሞላ ይዞታ ያለን ሰዎች የባለቤትነት ማረጋገጫ ደብተር አልተሰጠንም፤
• በመሬት ቆጠራው መሬት እያለን ስማችን ተይዞ የባለቤትነት መብት አልተሰጠንም፤
• የቤተሰብን መሬት ልጆች መውረስ እንዳንችል ተደርገናል የሚሉ ነበሩ፡፡

ለእነዚህ ጥያቄዎች ምላሽ ለማፈላለግ በቦታው ከሚገኙት ከአማራ ክልል ውጭ የክልሉ መንግስት አማካሪ እና ከክልሉ ውጭ የብአዴን ማስተባበሪያ ፅ/ቤት ሃላፊ አቶ ባዘዘው ጫኔን አነጋግረናል፡፡

አቶ ባዘዘው ጫኔ ከኦሮሚያ ክልል ምዕራብ ሸዋ ዞን ዳኖ ወረዳ አመራሮች፣ ከአዋድ ጉሉፋና አጅላ ደሌ ነዋሪዎች ጋር ምክክር አድርገዋል::

በዚህም መሠረት ከሁለት ሄክታር በላይ መሬት ያላቸው ጥያቄ አቅራቢዎች ይዞታ ነባር መሬት ውስጥ መመደቡን እና ያለመመደቡን በጥናት እንዲፈታ እንዲሁም በተያዘው የምርት ዘመን የመኽር ወቅት በመጀመሩ መሬታቸውን እንዲጠቀሙ ጊዜያዊ ስምምነት ላይ መድረስ ተችሏል::

ከሁለት ሄክታር መሬት በታች ያላቸው ግለሰቦችን በተመለከተ ግን የይዞታ ማረጋገጫ ሳይሰጣቸው መቅረቱ ተገቢ እንዳልሆነ መክረው በአስቸኳይ ህጋዊ የመሬት ይዞታ ማረጋገጫ እንዲሰጣቸው የጋራ ስምምነት ላይ መድረስ ተችሏል::
የመሬት ማረጋገጫ ዝርዝር ሲሰበሰብ መሬት እያላቸው የባለቤትነት ዝርዝር ውስጥ ያልገቡ ግለሰቦችም በአካባቢው ህብረተሰብ ተገምግመው ምላሽ እንዲሰጣቸው የመፍትሄ ሃሳብ ተቀምጧል::
እንደ ሌላው የኦሮሚያ ተወላጅ ሁሉ በክልሉ ተወልደው ያደጉ ወጣቶች ህጋዊ ውርስ እና ተመሳሳይ የመሬት ባለቤትነት መብት እንዲሰጣቸው እንዲሁም የስራ እድል እንዲመቻችላቸው በሚያስችሉ ጉዳዮች ጊዜያዊ እና ዘላቂ መፍትሄዎች ላይ የጋራ መግባባት ተደርሶባቸዋል::

እንደ አቶ ባዘዘው ማብራሪያ በምክክሩ የአዋድ ጉሉፋና አጅላ ደሌ ነዋሪዎች የኦሮሚያ እና አማራ ህዝቦች የህዝብ ለህዝብ ግንኙነትን ለማጠናከር ከፍተኛ እንቅስቃሴ ማድረግ እንደሚገባቸው እና የበኩላቸውን እንደሚያደርጉ መናገራቸውን ገልፀዋል::

የተነሳው ጥያቄም በህዝቦች መካከል የተፈጠረ ችግር እንዳልሆነ አመላክተው በአመራሩ በኩል ፈጣን ምላሽ እንዲሰጥ የጋራ መግባባት መፈጠሩን አስታውቀዋል::
በቀጣይ የተነሱ ጥያቄዎች በህጋዊ መሰረት በዘላቂነት መፍትሄ በሚያገኙበት ዙሪያ የየክልሎቹ ከፍተኛ አመራሮች ተገናኝተው እንደሚመክሩም ታውቋል::

በግርማ ተጫነ – አብመድ

Share your thoughts on this post

Advertisements
%d bloggers like this:
Visit Us On TwitterVisit Us On YoutubeVisit Us On Instagram